Liberdade imprensa iha valor ba demokrasia no dezenvolvimentu nasionál

G-NEWS (DILI) – Prezidente Komisaun Organizadora ba Komemorasaun Loron Nasionál Liberdade Imprensa ba Dala IV, Suzana Bui-Rai Carlota Cardoso, afirma katak liberdade imprensa iha valor fundamentál ba demokrasia, justisa no dezenvolvimentu nasaun nian.

Suzana hato’o deklarasaun ne’e bainhira ko’alia kona-ba komemorasaun Loron Nasionál Liberdade Imprensa ba dala haat, ho tema “Media Livre, Demokrasia Metin”, ne’ebé realiza hamutuk ho komemorasaun ba dala 51 Traguédia Balibo Five, ne’ebé sai parte importante husi istória luta no rezisténsia povu Timor-Leste nian.

Prezidente interina nee hateten katak komemorasaun ne’e la’ós de’it momentu atu selebra, maibé mós oportunidade atu hanoin fila-fali sakrifísiu jornalista sira, avalia situasaun liberdade imprensa iha Timor-Leste no hafoun kompromisu hamutuk atu defende liberdade imprensa, liberdade espresaun no direitu públiku atu asesu ba informasaun.

“Iha fulan Outubru tinan 2019, Konsellu Imprensa hamutuk ho reprezentante órgaun komunikasaun sosiál no asosiasaun jornalista sira propoin loron 16 Outubru atu sai Loron Nasionál Liberdade Imprensa, nu’udar omenajen ba jornalista na’in lima ne’ebé mate iha Balibo iha tinan 1975, ne’ebé ita konese ho naran Balibo Five,” nia esplika.

Iha loron 24 fulan Maiu tinan 2022, Parlamentu Nasionál aprova Rezolusaun Nú. 95/IV, ne’ebé estabelese loron 16 Outubru nu’udar Loron Nasionál Liberdade Imprensa,hahú husi momentu ne’e, komemorasaun sai oportunidade importante atu hanoin fila-fali istória no sakrifísiu jornalista sira, no hametin komprensaun katak liberdade imprensa iha papél importante ba demokrasia, justisa no dezenvolvimentu nasaun nian.

Iha oportunidade ne’e, Suzana mós hato’o agradesimentu ba komunidade Balibo no Bobonaro, autoridade lokál no ema hotu ne’ebé durante tinan sira liubá fó apoiu, koopera no kontribui ba realizasaun atividade komemorativa sira iha Balibo.

Selebrasaun Loron Nasionál Liberdade Imprensa no komemorasaun Balibo Five iha tinan 2026 ne’e realiza liuhusi kooperasaun entre Konsellu Imprensa Timor-Leste, Governu liuhusi Sekretaria Estadu Komunikasaun Sosiál (SEKOMS) no asosiasaun jornalista sira.

Kooperasaun ne’e hatudu katak liberdade imprensa la’ós responsabilidade instituisaun ida de’it, maibé presiza kompromisu no responsabilidade hamutuk husi instituisaun Estadu, órgaun reguladór, organizasaun profisionál jornalista sira, órgaun komunikasaun sosiál, setór privadu, universitáriu, parseiru dezenvolvimentu no sidadaun hotu.

Nia subliña katak Konsellu Imprensa, tuir nia mandatu legál, iha responsabilidade atu promove liberdade imprensa, independénsia mídia, étika jornalístika no mekanizmu atu rezolve keixa no disputa iha área komunikasaun sosiál, tuir nia kompeténsia.

Enkuantu ne’e, SEKOMS iha papél importante atu dezenvolve setór komunikasaun sosiál no fasilita komunikasaun entre Governu no órgaun komunikasaun sosiál sira.

Iha parte seluk, asosiasaun jornalista sira kontribui ba reprezentasaun interese profisionál jornalista sira, dezenvolvimentu kapasidade liuhusi formasaun no promosaun padraun jornalístiku ne’ebé profisionál, independente no responsável.

Ho nune’e, komemorasaun Loron Nasionál Liberdade Imprensa ba dala IV no Balibo Five ba dala 51 iha tinan 2026 sai nu’udar momentu atu hametin kompromisu hamutuk hodi defende liberdade imprensa, promove jornalizmu independente no responsável, no garante katak povu Timor-Leste bele asesu ba informasaun ne’ebé loos, independente no konfiável.