G-NEWS (DILI) — Ministru Prezidénsia Konsellu Ministru no Interlokutór iha diskusaun sira kona-ba Greater Sunrise (GS), Agio Pereira, hasoru malu ho Reprezentante Espesiál Austrália nian ba Projetu Greater Sunrise, Steve Bracks, iha loron 19 fulan-jullu iha Darwin.
Enkontru entre Agio Pereira no Steve Bracks ne’e, ho objetivu atu halo balansu kona-ba situasaun no fahe informasaun no pontu-de-vista iha ámbitu sira-nia papél nu’udar reprezentante Timor-Leste no Austrália nian iha diskusaun sira kona-ba inisiativa Greater Sunrise (GS), nune’e mós konsidera saida mak períodu tuirmai lori no saida mak sira bele hala’o hamutuk.
Durante enkontru ne’e, Steve Bracks ko’alia kona-ba ninia vizita foin lalais ne’e ba kosta súl Timor-Leste nian no fahe ninia impresaun no perspetiva kona-ba futuru instalasaun Baze Fornesimentu Suai nian.
Tuir komunikadu imprensa, ne’ebé G-NEWS asesu, iha sábadu (202072024) katak, Ministru Agio Pereira agradese ba Steve Bracks ba vizita ba kosta súl no komunidade ne’ebé lokaliza iha área projetu.
Ministru Agio hato’o esperansa katak reprezentante na’in rua ne’e kontinua servisu hamutuk hodi alkansa objetivu ne’ebé benefisia ba nasaun rua, Timor-Leste no Austrália.
Enviadu na’in rua ne’e mós halo vizita hamutuk ida ba instalasaun prosesamentu LNG iha rai-maran Ichthys iha Bladin Point, besik Darwin, iha ne’ebé gás malirin hosi kampu Ichthys nakfilak ba líkidu. Vizita ne’e organiza hosi Chris Wilson, Vise Prezidente Senior ba Operasaun sira iha INPEX.
“Objetivu husi vizita ne’e atu observa didi’ak instalasaun no montajen modul hotu-hotu, ne’ebé importante tebes ba prosesu hotu-hotu, liu-liu unidade likifikasaun LNG 1 no 2”, haktuir iha komunikadu imprensa.
Durante vizita ba sentrál LNG, INPEX haktuir katak Presiza másimu neen Tinan 20 atu instala módulu hotu-hotu no sai operasionál tomak, ho kustu totál kalkuladu hamutuk biliaun US$40.
Ichthys LNG maka empreza konjunta ida entre empreza sira grupu INPEX nian (operadór), parseiru prinsipál Total Energies no subsidiáriu australianu sira hosi CPC Corporation Taiwan, Osaka Gas, Kansai Electric Power, JERA no Toho Gas.
Iha fulan-Maiu tinan ne’e, Primeiru-Ministru Kay Rala Xanana Gusmão nomeia Ministru Prezidénsia Konsellu Ministrus, Agio Pereira hanesan Interlokutór iha diskusaun Greater Sunrise, hodi halo diskusaun ho Steve Bracks, nu’udár reprezentante espesiál Austrália nian kona-bá dezenvolvimentu Greater Sunrise.
Governu da-sia ne’ebé lídera hosi Xanana Gusmão, konsidera dezenvolvimentu Greater Sunrise hanesan polítika prioridade no estratéjika ba Timor-Leste, atu bele hari’i baze metin ba ekonomia ne’ebé sustentável, fó benefísiu no oportunidade sosiais sira ba povu Timor tomak.
Editór Testu : Amito Qonusere Araújo
loading="lazy" />