AJTL no Oxfam realiza mídia Tour kona-ba asaun Justisa iha Loré

G-NEWS (DILI) – Ajensia Internasionál OXFAM Timor Leste no Asosiasaun Jornalista Timor Lorosa’e (AJTL) hala’o media tour ba jornalista na’in-17 hodi hala’o kobertura ba asaun justisa klimatika iha postu Loré Munisípiu Laútem.

Liuhosi konferénsia Imprensa iha iha edifísiu Oxfam Hudilaran, kuarta feira (29052024), koordenador estratéjia no Envolvimentu Oxfam iha Timor Leste Adilsonio da Costa Junior hateten,  programa mídia Tour ne’e hanesan parseria estratéjiku ida hosi Oxfam no AJTL ne’ebé foka liu ba komunidade sira ne’ebé vítima ba mudansa klimátika liu-liu ba ema ho defisíensia no feto vulnerável sira iha area rural.

“Programa Media tour ne’e ita bolu dehan asaun ba justisa klimátika  hanesan parseria estratéjiku ne’ebé Oxfam no AJTL servisu hamutuk atu kontinua foti papel oinsá hala’o kobertura ba asuntu mudansa klimátika nia  impaktu ba komunidade sira, liu-liu ba ema ho difisiensia no feto vulnerável  sira iha area rural”, koordenador estratéjia no Envolvimentu Oxfam Adilsonio da Costa Junior.

Iha biban ne’e, Prezidente asosiasaun Jornalista Timor Lorosa’e Zevonia Vieira apresia ba Oxfam ne’ebé envolve AJTL hodi hala’o advokasia ba problema asuntu mudansa klimátika.

“Apresia Tebes Servisu Kolabora Oxfam iha Timor Leste ne’ebé mak tau importánsia oinsá halo involve AJTL hodi hala’o Advokasia kona-ba problema asunto mudansa klimátika no oinsá mak halo advokasia makaas liu tan ba mudansa klimátika ne’ebé hasoru iha tempu agora” Prezidente AJTL ko’alia ba ba Jornalista sira.

Zevonia Kompromete, AJTL nafatin fo espasu ba membru sira hodi halo kobertura barak liu kona ba lian kbi’it laek sira ne’ebé hasoru injustisa liu-liu ba mudansa Klimatika nian.

” AJTL kontinua nafatin fo espasu ba nia membru sira hodi halo kobertura ka hakerek barak liu ba lian kbi’it laek sira ne’ebé hasoru injustisa ba mudansa klimátika ne’ebé mak moris hanesan toos na’in sira, feto vulnerável no ema ho defisiensia no ferik katuas sira ” haktuir Zevonia.

Programa mídia Tour ne’e hala’o durante loron tolu, hahú iha loron 29 fulan-Maiu to’o loron 1 fulan-Juñu ne’ebé akumula jornalista hamutuk na’in-17 kompostu hosi mídia online, imprime, no  elektróniku.

Jornalista        : Martinho Belo

Editór Testu    : Amito Qonusere Araújo