G—NEWS (BAUCAU)— Bispu Diocese Baucau, Dom Leandro Maria Alves selebra missa Domingo Solenidade Ascenção Na’i nian hamutuk ho sarani sira iha Igreja Catedral Baucau, iha loron 01 fulan-Juñu tinan 2025.
“Ohin ita selebra solenidade da ascenção do Senhor, Jesus sa’e ba Lalehan. Festa boot ida ne’e hatudu mai ita fiar na’in sira, katak depois de Jesus hala’o tiha nia misaun iha rai ne’e ; ho ninia-An, ho domin hodi haklaken Maromak nia Reinu iha mundo, agora Nia fila hikas ba hamutuk ho Aman Maromak”. hateten Dom Leandro iha homilia.
Bispo kontinua, “iha festa boot ida ne’e mos ita rona Jesus nia mandatu ba ita fiar na’in sira atu sai sasin kona-ba Jesus nia obra sira. Jesus husu ita sira ne’e hotu, hahú hosi Apóstolo sira atu sai kontinuador projetu salvasaun Maromak nian. Jesus tau konfiansa ba ita ema no Jesus hein katak ita sira ne’e hotu labele fila kotuk ba Nia maibé sai sasin di’ak iha ita nia moris lor-loron nian”.
Nune’e ascenção Na’i nian ne’e nu’udar mensajen ksolok ba fiar na’in sira, tanba Jesus fila hikas ba moris hamutuk ho Aman Maromak ne’e nu’udar prova ida, katak ema ne’ebé fiar no moris tuir Maromak nia hakarak la moris leet de’it maibé sei iha mos possibilidade atu moris hamutuk ho Maromak.
“Kristu nia tama ba Lalehan no moris hamutuk ho Aman Maromak ne’e, nu’udar mensajen ksolok boot tebes ida mai ita hotu, katak ema hotu ka ita sira ne’e hotu hala’o ita nia knaar no fiar sarani nian ho loloos . Ita nebé fiar metin iha Kristu ita la moris saugati de’it maibé ita mos hetan prémiu rohan laek, katak ita mos sei tama iha reinu Lalehan hodi moris hamutuk ho Na’i Maromak”. Hateten Dom Leandro.
Bainhira bensaun final remata tiha, Dom Leandro husu ba sarani sira hotu atu reza ba Dc. Euclídio Maria Marques, SDB. nebé prepara-an atu simu sakramentu ordem segundo grau nian (ordenação sacerdotal) iha tinan ida ne’e.
loading="lazy" />