G-NEWS (DILI) – Centro Audiovisual Max Stahl Timor (CAMSTL) loke espozisaun durante fulan ida hahú hosi loron 7 fulan novembru to’o loron 7 fulan dezenbru tinan ne’e.
Diretór Ezekutivu CAMSTL Eudicitio Pinto, ba jornalista G-News kuarta-feira (Centro Audiovisual prepara espozisaun ho tema “Livru boot Istoria Timor-Leste nian” hosi Aniversáriu CAMSTL ho tinman 20/10 no rekoñesimentu hosi UNESCO hanesan “Memória do Mundo”.
“Espozisaun ne’e parte importante hosi eventu ne’e tanba ita kria ambiente siknifikativu ba estudante no vizitante sira atu aprende ita nia sequensia istória hosi matéria Centro Audiovisual Max Stahl. Ita nia servisu hanesan prezervasaun Audiovisual Memoria nasional entau liu husi espozisuan ne’e atu hatudu valores istória no memória moris nafatin atu jerasional sira bele hatene no koñese nafatin nia identidade no istória funu nian. Liuhosi espozisaun ne’e, públiku jerál bele mós hatene no koñese di’ak liu tan servisu Centro Audiovisual Max Stahl Timor-Leste atu sira bele asesu Plataforma ne’ebe centro Audiovisual Max Stahl iha”, Nia esplika.
Diretór ezekutivu CAMSTL ne’e husu ba públiku tomak atu bele partisipa iha espozisaun ne’e tanba ne’e espozisaun ne’e sei fó espasu atu hatene kona-ba istória rezisténsia.
“Iha Mensajen barak ne’ebe mak vizintante sira sei hatene tuir kada pajina istoria nian, mak hanesan; Vizitante hotu sei rekoñese estétika identidade kultural no objeitu sira ne’ebé reprezenta munisipiu 12 inklui RAOEA no Ataúro. Vizintante sira sei hetan simu ho lian dadolin Bemvindu husi lian 30 etnográfiku hosi lian hotu iha Timor-Leste. Estudante no Vizinantante sira sei koñese no haree memória tempu luta nian, hosi tempu kolonial no invazaun sira ka “tempu da gueara”.
“Tamba kada tema no sala mai hosi kada pájina istória Timor-Leste nian. Iha Espozisaun ne’e ita mós sei lori vizantante sira hodi hatene juventude loriku as’wain nia aspirasaun no asaun liuhosi Cartas sira ho lia-fuan oioin no rona lian original sira iha demostrasaun. Vizitante sira mós sei haree similaridade fatin Falintil sira nia moris no lian; hanesan Saudozu Comandante David Alex “DAITULA” iha kuak laran ne’ebe entervista husi Saudozu Max Stahl”, Diretór ne’e esklarese.
“Hafoin ida ne’e vizintante mós, sei kontinua kedas ba sala prinsipál, ida ne’ebé mak maiória hosi konteúdu audiovizuál CAMSTL nian sei hatudu iha monitór ida-ne’ebé vizitante sira sei esperimenta traballu peskiza nian iha Sentru ho sira-nia liman fuan rasik hosi plataforma modernu no dijitalizada. Tuir kedas vizintante sira sei hare sala Homenajem Max Sthal nian ne’ebé sei hatudu importansia journalism nian iha sosiedade, husi 1974 to’o1999. Ikus liu, fatin kona-ba kontemplasaun. Vizitante sira hotu ba iha momentu ida introspektivu ba reflaksaun nian liu husi video-art ne’ebé espektkulár tebes. Husi ne’e kada individu bele husu nia an Saida mak nia sei halo ba konstrusaun Estadu no nasaun iha futuru”, Diretór CAMSTL ne’e haklean liu-tán.
Iha Matéria Audiovisual no matéria arte kontemporáriu ne’ebé halo kombinasaun iha espozisaun ne’e. Espozisaun ne’e primeira-ves espozisaun boot ne’ebé ho instalasaun hamutuk entre arte kontemporáriu ho audiovisual ho durasaun fulan ida iha Timor-Leste.
Tanba ne’e, Diretór Ezekutivu CAMSTL Eudicitio Pinto husu ba públiku atu aprende istória rezisténsia Timor nian, nune’e bele hariku koñesimentu.
“Ha’u nia mensajen mak, husu ba públiku tomak atu mai aprende ita nia istória liuhosi Audiovisual no arte kontemporáriu atu hariku tan ita nia koñesementu iha istória no servisu kona-ba dijitalizasaun. Iha oportunidade ida ne’e ita mós sei hatene oinsa bele halo peskiza liuhosi Audiovisaul prezervasaun atu kompleta ita nia tezes no siensia sira iha nível akadémiku no sientifiku”, Eudicitio Pinto haktuir.
Jornalista : Ekipa G-News
Editór Testu : Amito Qonusere Araújo
loading="lazy" />