G-NEWS (DILI) – Kuarta-Feira (06092023) semana ne’e, Rádiu Televizaun G-News (TV streaming no Online) hetan notifikasaun hosi Konsellu Imprensa Timor Leste, tanba ho notísia ida ho títulu kona-ba Bei-oan ida taa nia avo mane to’o mate fatin iha Maina-2 Laútem, iha loron 28 fulan jullu tinan 2023, iha link ida ne’e https://g-rtv.com/blog/bei-oan-ida-taa-nia-avo-mane-too-mate-fatin-iha-maina-2-lautem/4685/informasaun-atual/ .
Tuir notifikasaun, konteúdu notifikasaun, Konsellu Imprensa esplika katak, konteúdu hosi notísia ne’e hakerek ho diak tuir rekezitu no padraun jornalístiku tanba jornalista hakerek konteúdu notísia ne’e ho diak hosi nia títulu, lead, body to’o notísia nia ending.
“Maske notísia ne’e Konsellu Imprensa esplika ona katak, konteúdu notísian ne’e diak, maibé Konsellu Imprensa konsidera notísia ne’e viola kódigu étika jornalístika iha pontu 10 tanba públika ho momoos iamjen vítima (seim blur) Bendito Miranda ninia mate ne’ebé nakonu ho raan fakar iha aldeia Coso munisípiu Laútem”, haktuir iha karta notifikasaun ne’ebé Redasaun G-News asesu, kuarta-feira (06092023).
Iha notifikasaun ne’e mós esplika katak, notifikasaun ne’e tanba kestaun étika mak presizamente iamjen ka fotográfia iha notísia ne’e tenke taka ka blur atu respeita privasidade vítima no sentiment família nian nomos atu evita trauma ba ema seluk, liu-liu kona-ba raan-sulin iha imajen notísia ne’e.
“Ho faktu provadu sira ne’e hotu, Concelho de Imprensa nota katak, Xefe Redasaun la ezerse diak ninia dever sira hanesan sein verifikasaun ba notísia sira antes públika, ikus mai publikasaun la tuir padraun Lei Komunikasaun Sosiál no Kódigu Jornalístika”, haktuir karta notifikasaun.
Alende ne’e, Konsellu Imprensa mós notifíka kona-ba notísia ho nia títulu Atualizasaun ba mudansa lideransa interna Fretilin, ne’ebé públika iha TV Streaming G-News, iha loron 27 fulan Jullu tinan 2023, tanba la tuir prinsípiu Jornalizmu Cover Both Side (Kobre parte rua) tanba la halo konfirmasaun ho parte líder sira partidu Fretilin nian. Iha karte ne’e mós Konsellu Imprensa mensiona katak, afinál programa ne’e nia konteúdu kontroversiál ne’ebé bele hamosu konflitu polítiku ne’ebé dirije ba konflitus kriminál.
Konsellu Imprensa aplika sansaun disiplinar bazeia ba númeru 2 hosi artigu 20, lei Nú 5/2014, loron 19 fulan Novembru Lei Komunikasaun Sosiál, kona-ba dever Jerál sira, no Alinea c) hosi artigu 44 kona-ba Kompetensia ne’ebé dispōe.
Tuir informasaun ne’ebé G-News asesu, Konsellu Imprensa Timor Leste mós notifíka Mídia Estatal Rádiu Televizaun Timor Leste, Empreza Públika (RTTL-EP), no mídia privadu balun sira hanesan Online Hatutan.com, STL news, no Gardamor TV.
Entertantu, Konsellu Imprensa Timor Leste nia karta notifíkasaun, ne’ebé asina hosi Prezidente Otelio Ote, iha loron 28 fulan Agosto tinan 2023, ho nú: 17/CI/2023, ho naran Amito Araújo (autor), ho númeru kartaun CI/92/2017 nu’udar Xefe Redasaun Guardamor TV.
Tanba ne’e, Konsellu Imprensa mós husu ba Xefe Redasaun G-News, iha direitu atu halo defeza bakestaun ne’e tuir prazu loron sanolu-resin-lima nia laran.
loading="lazy" />