G-NEWS (DILI) – Segunda Feira (08012024) semana ne’e iha Aeroportu Internasional Nicolau Lobato Comoro, Servisu Migrasaun detekta timoroan na’in-6 ne’ebé atu hala’o viajen ba Kambodia, maibé viajen ne’e kansela tanba identifika la iha tickete aviaun atu fila fali mai Timor, no la iha viza atu tama ba nasaun Kambodia.
Liuhosi konferénsia imprensa, tersa-feira (09012024) iha salaun konferénsia PNTL Kaikoli, Dili, Portavoz Komandu-Jerál PNTL Superintendente João Belo dos Reis relata kona-ba movimentu sidadaun Timoroan na’in-6 Servisu Investigasaun Kriminál asegura tanba iha indikasaun forte bele sai vítima ba trâfiku umanu.
“Depois de servisu imigrasaun detekta sira nia dokumentus liu-liu tickete atu fila la iha, depois sira nia viza atu tama nasaun Kambodia la iha, nune’e servisu imigrasaun entrega ita nia maluk na’in-6 mai iha departamentu investigasaun hodi halo identifikasaun maijumenus sira atu ba ne’ebé, se mak fasilita sira”, Superintendente João Belo relata kona-be ne’e.
Portavoz Komandu-Jerál PNTL ne’e esplika liu-tán katak, hosi identifikasaun ne’e konsidera sira sai vítima ba trâfiku umanu tanba ema rekruta sira liuhosi online ho kompaña multigame hosi Brazil.
Tuir informasaun, rekrutadu hirak ne’e halo video call maibé Brazileiru refere nunka hatudu oin ba sira.
“i depois ba fatin ne’ebé sira atu ba, ne’e dehan atu servisu iha kasino”, Superintendente João Belo dos Reis klarifika.
“Hosi esperiensia ne’ebé mak ita iha, ba maluk sira ne’ebé servisu bai ha vítima trâfiku umanu iha Malazia, nia modus oprande hanesan, ne’ebé rekruta hosi online, depois kompaña fasilita dokumentus to’o ikus ita nia maluk sira ne’e vítima, tanba ne’e PNTL tenke asegura, proteze ita nia sidadaun sira labele vítima nafatin ba trâfiku umanu, hodi nune’e ita halo identifikasaun, depois karik posivel envolvimentu Timoroan balun mak fasilita ka lori sira, ita sei bolu hosi atu halo identifkasaun ba sira, depois kazu ida ne’e mós ita sei rejistu ba iha Ministériu Públiku”, Portavoz Komandu-Jerál ne’e esplika liu-tán.
Tuir dadus ne’ebé Portavoz Komandu-Jerál PNTL Superintendente João Belo dos Reis relata katak, prosesu sira ne’e la tuir regrais tanba SEFOPE la hatene. Alende ne’e kompaña ne’e rasik la rejistu iha Timor, inklui ema ne’ebé halo rekrutamentu laos iha Timor.
Tuir dadus, Timoroan sira ne’ebé sai vítima ba trâfiku umanu ne’ebé lori fila ona hanesan akontese iha Malazia, hamutuk na’in 63, iha ne’ebé kazu ne’e prosesu lao ona, balun tama ona prizaun preventiva. PNTL sei buka nafatin hirak ne’ebé envolve, atu Timoroan ka estranjeiru, tanba iha posibilidade PNTL servisu hamutuk ho Interpol atu halo kapturasaun ba sira.
Jornalista : Ekipa G-News
Editór Testu : Amito Qonusere Araújo
loading="lazy" />