Dom Leandro ordena diákonu Aquino Mazarelo Dias iha Lospalos

G-NEWS (LOSPALOS) — Bispu Diocese Baucau Dom Leandro Maria Alves, ordena  Diákonu Aquino Mazarelo Dias, SDB, iha Párokia São Paulo Lospalos, kinta-feira (15082024) ne’e.

Ordenasaun Prezbiterál ihan Parójia São Paulo Lospalos ne’e foin akontese depois durante tinan 17 liu-tiha la iha ordenasaun ba Lospalos oan liu-liu ba família Salezianu sira.

“Liutiha tinan sanulu resin-hitu, Família Saleziana iha área Lautem, liuliu iha parókia Saun Paulo Lospalos tan grasa Maromak nian diretamente partisipa iha Misa ordenasaun Prezbiterál Quinamoco oan ida, Diácono Aquino Mazarelo Dias, sdb. Amu-Bispu Baucau, Dom Leandro Maria Alves mak prezide Misa Solenidade Assunção Na’i-Feto Santa Maria nian  no konfere Sakramentu Orden ba Diácono Aquino”, liu husi komunikadu Salezianu de Dom Bosco Timor Leste, kinta-feira 915082024).

Iha komunikadu ne’e mós haktuir kata, konselebra iha selebrasaun Eukarístika ne’e, amu Provinsiál Salezianu Timor Leste, Pe Anacleto Pires, SDB, Amu Lulik kleru diosezanu balun no Amu Lulik Salezianu sira, marka prezensa mós autoridade sivil no militár Munisípiu Lautein nian, reprezentante Governu, Irmán sira husi kongregasaun oioin, família Diácono Aquino no sarani no konvidadu sira seluk.

Amu Provinsiál Salezianu Timor Leste Padre Anacleto Pires, SDB iha nia intervensaun ko’alia katak vokasaun ne’ebé Padre Aquino hetan tanba grasa ne’ebé Maromak bolu ba nia.

“Vokasaun sai Nailulik ne’e Maromak nian. Maromak bolu ema ida, ema ida hatan”, Padre Anacleto Pires, SDB.

 Ho ordenasaun saserdotal ba Diákonu Aquino sai Amu Lulik presiza orasaun husi sarani sira tomak tanba orasaun ne’e importante liu hodi tulun nia ba buat ne’ebé mak nia konsidera ba vokasaun ida ne’e to’o roha laek.

“Ho orasaun mai ita akompaña Padre Aquino Mazarelo Dias, SDB iha ninia moris nu’udar na’i-lulik Cristo nian hodi haklaken Maromak Futar Liafuan no selebra sakramentu sira, liuliu Sakramentu Rekonsiliasaun no Eukaristia ba sarani sira iha ne’ebé de’it nia sei hala’o nia knaar ba tuir Maromak nia hakarak”. 

Editór Testu : Amito Qonusere Araújo