G—NEWS (DILI) — Arsebispu Metropolitana Diocese Dili Dom Virgilio Kardeal do Carmo da Silva, SDB, deklara ofisialmente kona-ba Papa Francisco, líder Igreja Katólika Apostólika Romana nia mate, iha segunda-feira (21042025) nia mate iha Roma.
Iha salaun konferénsia Câmara Eclesiástica Dili, Dom Virgílio Kardeal do Carmo da Silva hateten sente triste ho Papa Francisco nia mate, iha segunda-feira (21042025) loraik oras Timor Leste.
“Ho laran triste, iha momentu ida ne’e, hakarak atu konfirma ba povu timor leste tomak, liu-liu ba sarani sira, kona-ba Papa Francisco nia mate. Simu direitamente telephone husi Marco Sprizzi, tuku 7 minutu 35 dader oras Italian nian”, Dom Virgilio esplika, liu husi konferensia imprensa.
“Notisia ida ne’e loos duni, ita laran todan no triste, ita sente ninia prezensa iha ita nia leet. Nia fila husi Timor, katak ha’u nia fuan iha hela iha Timor.”
Dom Virgilio ko’alia mós kona-ba Papa Francisco ninia prezensa iha Timor Leste, desde iha loron 9-11 fulan-Setembru tinan 2024, iha Timor Leste.
“Ita sente oinsa Papa Francisco ninia prezensa, ninia domin ba Timor Leste durante loron tolu. Nu’udar ema, ita hotu laran triste, tanba lakon papa ida, ne’ebe ita hadomi, mate loos iha loron Paskua nian”, Dom Virgilio Kardeal do Carmo da Silva.
Relasiona ho ne’e, Konferensia Episkopal Timorense mós konvida sarani hotu, atu reza ba Amu Papa nia falesimentu.
Aliende ne’e, líder másimu ne’e mós lori Konferensia Episkopal Timorense nia naran, husu ba Padre pároku hotu atu hala’o misa espesial ba Papa Francisco nia mate iha tersa feira aban dáder.
“CET , hahú aban dader, iha pároku hotu-hotu, konvida amu paroku hotu-hotu atu aban dader iha ida-idak nia paroku hodi oferese misa espesial ba Papa Francisco nia klamara”.
Dom Virigilio mós konfirma katak, diocese ida-idak sei halo misa espesial ba ba Papa Francisco, hodi hein loron anunsiu ba funebre nian.
loading="lazy" />