G-NEWS (DILI) – Edukasaun família nian importante teb-tebes iha sosiedade ida nia leet. Kuandu família nia edukasaun mínimu tebes ba membru família tomak, ne’e sei lori oan sira ba dalan la di’ak, no lori oan sir aba situasaun dezorganizadu. Kazu barak akontese ona no hatudu momoos ona katak, edukasaun família mak sai matadalan ba oan sira nian iha sosiedade ida nia leet. Razaun tanba ikus-ikus ne’e joven sira kontinua kria instabilidade tanba família no inan-aman sira nia kontrolu mínimu, no edukasaun família menus tebes, tanba ida-idak preokupa ho servisu loron-loron, iha ne’ebé defisil tebes atu halibur membru família tomak.
Maria Alves, sidadaun ida iha Becora ba G-News, tersa-feira (19092023) katak, durante ne’e labarik, liu-liu joven sira la dun iha kontrolu másimu hosi família sira, nune’e afeta ba sira ransu livre, hodi konsumu alku, ikus mai provoka malu, no kria instabilidade iha sosiedade nia leet.
Tuir nia, inan-aman no família sira iha responsábilidade atu kontrola oan sira bainhira ransu livre, tanba ransu ne’e iha parte di’ak no balun la di’ak. Tanba ne’e inan-aman no família labele abandona oan sira atu ransu livre, no buka hatene sira nia atividade loron-loron, liu-liu bainhira sira sai ona hosi uma atu ba halimar ho nia kolega sira.
“Se inan no aman ida mak la kontrola oan sira sai ba ransu ho nia maluk sira, la buka hatene, entaun labarik sira sente sira nia án livre, entaun sir abele halo buat ruma tuir sira nia hakarak, kuandu akontese ona buat ruma, inan-aman ka família mak lori todan”, tenik Nia.
Durante ne’e, intreprepatasaun públiku nian nota katak, kauza hosi problema sira ne’ebé akontese tanba joven barak dezempregu ka la servisu, maibé maiória envolve ne’e, hosi estudante sira, no dalaruma mós sidadaun balun hala’o atividade negósiu. Tuir maria katak, kauza ne’e laos kona-ba dezempregu, maibé autór sira barak liu ho intensaun.
“Ha’u la fiar dehan la servisu. Atu servisu hanusa bee agora sira sei eskola nno estudante ne’e, no mesak labarik ki’ik de’it mak provoka malu. Se hanesan maun dehan la servisu, ne’e la iha, balun iha ami nian Becora ne’e, balun servisu hela. Ne’e mesak lohi de’it, balun ho intensaun, tanba labarik sira provoka malu, balun hosi arte marsiais seluk, entaun la gosta malu, komesa ona provoka malu, halo problema, tuda malu, tolok malu”, Nia haktuir.
“Maun labarik ne’e mesak la iha étika de’it, tolok malu, inan-aman iha uma hela, sira tolok, aihhhh Na’i ehhh, inan iha uma tur nonok ninia, hala’o servisu, sira mak hemu tua lanu, inan mak lori todan, pois ita haree mesak estudante de’it, sira SMA, universidade, ne’e dehan katak, edukasaun mak la iha”, Maria afirma tán.
Iha parte seluk, Armindo Espirito Santos iha LEcidere inform aba G-News katak, konflitu ne’ebé akontese envolve hosi joven sira, maiória estudante sira ne’ebé membru ba organizasaun arte marsiais.
“Arte marsiais ne’e di’ak, maibé labarik sira utiliza ne’e mak halo arbiru, tanba doutrina arte marsiais la hanorin atu ba baku malu, tolok malu, ka oho malu, maibé hanorin ema atu atu respeita, ajuda. Labarik sira ikus-ikus ne’e halo oin seluk fali, ba treinu tiha, fila mai atu baku tán ita”, Armindo fó sasin.
“Dalan di’ak mak família ida-idak kontrola oan sira hahú hosi uma laran. Husu tuir, labarik atu ba ne’ebé, ba halimar ho se, ba halo saida, ida ne’e importante, se lae, mak sai dáder, pois loron ida mak tama uma mai. Ida ne’e susar. Maibé ita mós labele fó sala ba inan-aman ka família sira, tanba dalaruma sira hala’o servisu, entaun la iha tenpu atu bele fó moral ka ko’alia ho oan sira, ikus mai labarik sira livre demais, hatoman-án ona, kuandu halo problema, hakfodak mais polísia kaer ona, mais buat hotu liu ona”, Nia hakotu.
Calisto Ximenes, ko’alia ba G-News, tersa-feira (19092023) iha Palásiu Governu nia oin katak, konflitu sira ne’ebé akontese kauza hosi edukasaun familiar menus tebes. Alende ne’e lei sira ne’ebé defende atu labele baku labarik sira sai hanesan fatór ida.
“Lei sira agora dadauk dehan laen labele baku feen, labele baku labarik sira, mestre sira mós labele baku labarik sira iha eskola, ida ne’e mak halo labarik sira la tauk, tanba nunka sente oinsa ema baku sira ne’e moras ka lae. Entaun lei ne’e so para atu estraga labarik sira. uluk tempu Indonézia, ita nia inan-aman sira baku ita to’o dolar didi’ak mak hosi, buat ne’e halo ita tauk, mais agora buat hotu livre, demokrasia, entaun labarik sira la respeita ema boot, at liu mak tolok tán inan-aman, pois inan-aman baku, polísia mak kaer fali inan-aman, sá lei mak ne’e, haree agora saida mak akontese”, Calisto espresa ho sentimentu hirus.
“Mais pior liu mak mestre sira labele baku estudante sira, entaun labarik sira la iha respeita ba mestre sira, dalaruma atu baku tan professor, entaun susar atu kontrola. Inan-aman susar ona atu kontrola satan mestre sira, entaun buat sira ne’e lao sabraut loos”, Nia haktuir.
Jornalista : Ekipa G-News
Editór Testu : Amito Qonusere Araújo
loading="lazy" />