G-NEWS (DILI) – Edukador sira ne’ebé hala’o demonstrasaun iha edifísiu Ministériu Edukasaun, Vilaverde, hakilar ho lian makaas hasoru Ministra Dulce de Jesus Soares, hafoin hatun despaixu hodi hapara kontratu edukador sira nian, iha territóriu nasionál.
Tersa-feira (16012024) Demonstrante ida, edukador João hateten, desizaun ne’ebé Ministra Edukasaun foti la tuir prosedimentu normal ne’ebé iha, no ida ne’e hanesan atu taka futuru povu nia oan sira ne’ebé asesu ba edukasaun.
Tuir nia, ho desizaun ne’e kuaze prosesu aprendijajen iha eskola balun la lao tanba mestre sira nia kontratu ho kontratadu termina ona.
“Ida ne’e triste tebes. desizaun ne’e estraga de’it estudante sira”, João esplika.
Alende ne’e, demonstrante sira mós hakilar lian makaas, hodi sadik ba Ministra Edukasaun Dulce de Jesus Soares kona-ba rejultadu kontribuisaun ba Luta ukun-rasik-an nian, liuhosi rekoñesimentu hanesan kondekorasaun ka medalla ne’ebé Estadu atribui.
“Uluk ema halo funu ba Independênsia Ó iha ne’ebé, hatudu ó nia medalla, ukun an tiha mak sama rai Timor, ó halo saida ona ba Timor”, demonstrante sira hakilar.
Balun hakilar Ministra katak, governante ne’e lori ninia ema mai servisu la tuir regras, no aproveita de’it rejultadu eleisaun-jerál liuhosi esforsu partidu CNRT nian, ne’ebé lídera hosi Kay Rala Xanana Gusmão.
Sira mós kestiona kona-ba governante sira fó prioridade liu ba asesor sira, kompara ho timoroan sira ne’ebé kontribui makaas ba luta libertasaun nasionál.
“Timoroan ukun ne’e lori asesor sira mak luta, ne’e mak lori asesor sira mai hotu servisu, imi rona ka lae”, demonstrante sira ko’alia lian makaas.
Maske professor kontratadu sira halo demonstrasaun, maibé la iha anarkismu durante demonstrasaun lao, tanba hetan seguransa másimu hosi autoridade seguransa.
To’o informasaun ne’e fó sai, G-News seidauk hetan entrevista ho Ministra Edukasaun Dulce de Jesus Soares.
Editór Testu : Amito Qonusere Araújo
loading="lazy" />