G-NEWS (DILI) – Ekipa El-Matador Timor Leste sente orgullu ho prezensa Eis Senador Filipina nu’udar mós Boxista Internasionál Manny Pacquiao iha Timor Leste. Prezensa ne’e atu motiva joven sira ne’ebé iha interese ba atividade treinu boxe iha rai-laran.
Ba G-News, kinta-feira (28092023), Prezidente El-Matador Timor Leste, nu’udar mós treinador Abilio Orlando dos Santos sente orgullu, no espresa nia kontente.
“Primeiru,, orgullu no kontente ho prejensa legendáriu ida mai vizita ita nia rai doben”, Abilio hateten.
Tuir Abilio katak, ho prejensa Manny Pacquiao ne’e atu motiva liu-tán boxista Timoroan sira, atu sai manny Pacquiao foun iha futuru ida ba Timor-Leste”, Abilio hateten.
“Hau hanoin ita gasta ba Manny Pacquiao ho osan ida ne’e hanesan akomodasaun ba ótel no seguransa, no banner ne’ebé mak taka iha fatin-fatin Dili laran tomak, ne’e presija duni hasai osan. Buat gratis ne’e laiha, apalagi seorang Manny Pacquiao ne’e nia pasaran ba boxing mundu internasional ne’e karun. Ne’ebé presiza hasai osan duni”, nia aumenta tán.
Tuir nia, prezensa Legendáriu Internasionál Boxe nia vizita ne’e, fó impaktu positivu boot, no parte negativu oituan de’it, tanba ninia prezensa ne’e halo mundu koñese liutan Timor leste, duke atleta no boxista sira ba pasiar iha Xina, la partisipa eventu ASEAN Games tinan 2023.
Tanba ne’e, Prezidente El-Matador husu ba Governu, tenke prosesa autór ne’ebé mak laiha responsável no inkapasidade ba problema boxista sira ne’ebé mak ba falla joga iha Asean Games.
“Tenke prosesa tuir, investiga sira, tamba boxista sira sai vítima ba problema ida ne’e. Ami treinador durante ne’e kolen fo treinu ba boxista sira, atu lori Bandeira RDTL no reprejenta povu no rai ida ne’e, maibe ba ne’ebá ne’e ami hanoin joga, no fim la joga tanba dehan problema dokumentu no rekejitu sira balun mak la kompleta”, Abilio kestiona makaas.
Lideransa másimu El-Matador ne’e husu ba komisaun organizadora ASEAN Games 2023 Timor Leste atu klarifika falla ne’ebé akontese, no tenke toma responsavel.
To’o informasaun ne’e fó sai, G-News seidauk hetan komentáriu hosi autoridade Komité Olimpíku Nasionál Timor Leste (CONTL).
Jornalista : Ekipa G-News
Editór Testu : Amito Qonusere Araújo
loading="lazy" />