Estudante EBF Oe-Silo na’in 30 la ativa eskola tanba distánsia dook

G—News (OE-SILO) — Eskola Bázika Filiál Oe-Silo, ne’ebé lokaliza iha suku Bobometo, Sub-Rejiaun Oesilo, Oecusse-Ambeno, hasoru dezafiu sériu relasiona ho distánsia ne’ebé dook ne’ebé maioria ninia estudante sira la’o ain.

Husi estudante na’in 355 ne’ebé rejistadu, besik 30 hosi sira la partisipa ativamente iha atividade aprendizajen. Maioria husi estudante sira entre tinan 6 no 8, no maioria husi sira tenke halo viajen kuaze oras ida husi uma ba eskola.

Koordenadór Eskola Bázika Filiál Oe-Silo, Leonardo Oki, revela katak estudante lubuk ida labele partisipa ativu iha aprendizajen tanba limitasaun distánsia.

“Estudante sira balun hela dook no balun hela besik, sira ne’ebé la ativu eskola ne’e tanba kauza husi dalan dook, sira la ativu eskola ona hamutuk 30 pessoas, ha’u konfirma ho estudante nia inan aman maibé la halo klarifikasaun,” esplika Leonardo Oki iha nia intervista ho jornalista sira iha Kinta (23/01/2025).

Problema ne’e mos hetan atensaun husi Xefe Aldeia Hoeneno, Agustinho Tasi. Nia afirma katak estudante balu hili atu la kontinua sira nia edukasaun iha eskola tanba distansia dook liu.

“Ami nia eskola nemak araska tebes tanba alunus sei ki’ik ne’ebé ho idade 6 too 8 mak barak liu maibé distánsia dook entaun halo sira baruk ba eskola, dalaruma ba loron ida ka rua sira baruk ona to’o balun deside lakohi eskola, ne’ebé husu ba governu tau matan mai ami halo eskola ne’ebé besik”, dehan Agustinho Tasi.

Maibé, Diretór Rejionál Edukasaun RAEOA, Vincencio Cono, subliña katak distánsia labele sai obstákulu boot iha edukasaun. Tuir nia, importante atu hasa’e konsiensia ba komunidade, autoridade lokal, no Diresaun Edukasaun atu servisu hamutuk hodi buka solusaun.

“Tenpu Indonezia nia la’o dook, buka eskola maibé Timor Leste agora ne’e iha artigu 59 konstituisaun RDTL hateten katak, edukasaun universal no gratuita nebe laiha kestaun ida, maibé kestaun agora mak sensibilizasaun ba komunidade ne’ebé serbisu hamutuk ho autoridade komunitaria no diresaun edukasaun”, dehan Vincencio Cono.

Eskola Bázika Filial Oe-Silo oras ne’e dadaun akomoda estudante hamutuk 355. Maski iha dezafiu lojístiku no sosiál, eskola, hamutuk ho komunidade lokál, kontinua haka’as-an atu garante katak labarik ida-idak iha área ne’e bele hetan edukasaun ne’ebé di’ak no hanesan.

Jornalista                   : Martinho Belo

Editor Testu               : Amito Qonusere Araújo