G—NEWS (INTERNASIONÁL) — Enviadu espesiál Estadus Unidus nian, Keith Kellogg, hatete katak implementasaun sansaun sira hasoru Rúsia foin maka atinji nível 3 iha eskala 1-10 nune’e iha nafatin espasu hodi aumenta sansaun sira.
Enviadu espesiál EUA nian ba Rúsia no Ukránia hatete Kinta (6/2) katak EUA planeia atu aumenta maka’as presaun ba Rúsia liuhosi sansaun sira hodi hakotu nia funu iha Ukránia.
Iha entrevista eskluzivu ida ho New York Post, Enviadu Espesiál EUA nian, Keith Kellogg, hatete katak iha espasu barak atu aumenta sansaun sira hasoru Rúsia, liuliu iha setór enerjétiku rusu nian. Nia deskreve sansaun sira hasoru Rúsia hanesan “3 de’it” iha eskala 1 to’o 10 iha termu sira “presaun ekonómika ne’ebé todan tebes”.
Kellogg hatete ba New York Post katak nia komprende katak Moskovu no Kyiv sei tenke halo konsesaun sira hodi hakotu saida maka nia bolu oho “eskala industriál” iha funu.
Iha entrevista, Kellogg mós kritika aprosimasaun administrasaun eis-Prezidente Joe Biden nian hodi “apoia Ukránia bainhira de’it presiza”, hodi bolu ida-ne’e hanesan de’it “adesíva” no la’ós estratéjia ida.
Kellogg hatete katak administrasaun Trump nian konsentra iha “abordajen olístiku” ida hodi hakotu funu, kombina apoiu ba Ukránia no presaun ne’ebé aumenta ba Rúsia.
Xefe Estadu-Maiór Kellogg nian, Ludovic Hood, repete sentimentu sira ne’ebé hanesan bainhira nia hatete iha Kinta-feira ba Fórum Transatlántiku GLOBSEC nian iha Washington katak “Laiha buat ida maka imposivel iha faze ida-ne’e” kona-ba negosiasaun sira ba akordu dame nian.
Entretantu, pájina prezidensiál ukranianu nian fó sai katak iha loron-kinta ne’e, enviadu espesiál norte-amerikanu nian ko’alia mós ho xefe gabinete prezidensiál ukranianu nian, Andriy Yermak. Iha komunikadu, eskritóriu hosi Prezidente ukranianu, Volodymyr Zelenskyy, hatete katak sira na’in rua ko’alia kona-ba Kellogg nia vizita ba Ukránia, situasaun iha liña oin sira no kestaun sira seguransa nian ba ema sivil ukranianu sira.
Komunikadu ne’e hatete katak sira na’in rua fó “atensaun partikulár” iha sira nia konversa sira ba Konferénsia Seguransa Munique nian ne’ebé sei mai, ne’ebé tuir planu sei hahú iha semana ida nia laran.
Iha entrevista ketak ida ho The Associated Press iha Kinta-feira, Yermak subliña importánsia hosi “envolvimentu ativu” entre Ukránia no administrasaun Trump nian, liuliu iha negosiasaun sira dame nian.
Yermak subliña importánsia atu atualiza nafatin White House no fornese informasaun loloos kona-ba situasaun kampu funu nian. Nia hatete katak komunikasaun direta ho parseiru Amerikanu sira maka krítiku atu harii pozisaun komún ida, tanba imposivel atu forma planu dame ida lahó Ukránia.
Entretantu, iha relatóriu ikus liu hosi kampu funu nian, forsa aérea ukraniana nian fó sai iha loron-sesta (7/2) liuhosi nia konta mídia sosiál Telegram katak atake rusu sira iha rejiaun oioin hosi Ukránia hamate pelumenus ema sivíl na’in tolu no hakanek na’in lima seluk iha oras 24 ikus ne’e.
loading="lazy" />