G-NEWS (DILI) — Tuir Konferénsia imprensa iha Vatikanu, sesta-feira (27092024) nee, G- NEWS asesu Iha pájina Vaticano News Papa Francisco deklara nasaun Haat ne’ebé nia vizita hanesan Indonézia, Papua Nova Guiné, Timor-Leste no Singapura nu’udar viajen Apostólika Internasionál ba dala-45,
Iha Konferensia ne’e, Sua Santidade Papa Francisco informa ba jornalista sira ne’ebé akompaña iha peregrinasaun ne’e hateten, durante vizita ne’e hato’o sentimentu hadomi ba Timor-Leste, ho hakfodak ba Singapura, satisfeitu ho Indonézia no impresionadu ho Papua Nova Guiné.
“Timor-Leste iha kultura ne’ebé simples, familiar no ksolok. Ida-ne’e kultura moris nian: ita iha oan barak, barak. No bainhira ha’u ko’alia kona-ba lafaek sira, ha’u ko’alia kona-ba ideia sira ne’ebé bele mai hosi li’ur hodi estraga armonia ida-ne’e ne’ebé ita-boot iha. No ha’u sei hatete tan buat ida: ha’u monu ba domin ho Timor-Leste.”
“Ha’u la espera atu hetan Singapura hanesan ne’e. Sira bolu ida-ne’e Nova Iorke Leste nian, nasaun dezenvolvidu ida, ema moos, edukadu, sidade, edifísiu boot sira. Aleinde ne’e, ida-ne’e iha kultura interrelijiaun ne’ebé di’ak tebes.”
“Ha’u gosta Papua Nova Guiné no haree nasaun ida ne’ebé maka forte iha dezenvolvimentu. Hafoin, ha’u hakarak bá Vanimo hodi hasoru grupu padre no madre sira husi Arjentina ne’ebé serbisu iha ne’ebá no ha’u haree organizasaun ne’ebé di’ak tebes. Iha nasaun hotu-hotu, arte dezenvolve tebes: dansa sira, espresaun poétika sira seluk… Maibé iha Papua Nova Guiné no Vanimo dezenvolvimentu arte nian impresionante. Ida-ne’e impresiona tebes ha’u.”
“Indonézia hanesan nasaun ida ne’ebé dezenvolve hela, no buat ida ne’ebé karik presiza dezenvolve maka relasaun sosiál. Ha’u kontente tebes ho ha’u nia vizita ba nasaun ne’e. Bonita tebes!”
Tópiku sira seluk iha konferénsia imprensa maka funu iha Gaza no situasaun dramátiku iha Terra Santa. Pergunta ida ko’alia kona-ba tópiku eleisaun Amerikanu nian no difikuldade atu hili ema Katóliku ida. Pontífise uza liafuan sira abertura nian kona-ba Xina, hodi define ida-ne’e nu’udar “promesa ida no esperansa ida ba Kreda”.
Ko’alia mós kona-ba kastigu mate nian, abuzu hasoru menór sira, situasaun iha Venezuela no eventuál viajen ida ba Arjentina, ho parajen ida iha Illa Kanáriu sira. “Ha’u hakarak bá, ne’e ha’u nia ema sira, maibé seidauk deside.” Francisco dezisti vizita Paris iha fulan-Dezembru ba reabertura hosi Katedrál Notre-Dame.
Sua Santidade Papa Francisco hala’o nia vizita ba Ásia no Oceania durante loron 12 nia laran, hahú iha loron 1 too loron 13 fulan Setembru tinan 2024.
Jornalista : Martinho Belo
Editór Testu : Amito Qonusere Araújo
loading="lazy" />