G—NEWS (DILI) — Konsellu Ministrus aprova mós, liuhosi proposta Ministru Ensinu Superiór, Siénsia no Kultura, projetu Rezolusaun Governu ba suspensaun abertura siklu estudu foun sira iha Ensinu Superiór.
Tuir komunikadu ne’ebé públika sai iha portal governu nian, iha kuarta-feira, loron 9 fulan-Abril tinan 2025 haktuir kona-ba objetivu hosi rezolusaun Governu nian ida-ne’e mak atu suspende kriasaun ba kursu foun baxarelatu, lisensiatura, pós-graduasaun, mestradu no doutoramentu nian iha área sira ne’ebé kobre barak ona iha oferta sira ne’ebé eziste iha instituisoins ensinu superiór nian.
“Medida ne’e ho objetivu atu evita saturasaun (ne’ebé liu tiha limite) hosi merkadu traballu ho profisionais iha área sira ne’ebé eziste ona númeru sufisiente hosi formadu sira, hodi promove adekuasaun ida ne’ebé di’ak liu entre oferta edukasionál no nesesidades país nian” kontinua haktuir iha komunikadu.
Área sira ne’ebé afeta ba suspensaun ne’e inklui kursu Direitu ka Siénsia Direitu, Jestaun, Kontabilidade, Jestaun Finanseira, Jestaun Públika, Enjeñaria Sivíl, Enjeñaria Informátika, Konstrusaun Sivíl, Saúde Públika, Enfermajen, Parteira, Administrasaun Públika, Siénsia Polítika no Relasaun Internasionál.
Instituisaun ensinu superiór sira sei la bele loke kursu foun sira iha área sira-ne’e to’o diploma legál foun sira kona-ba planeamentu kurrikulár no regulamentu ba siklus estudu nian hetan aprovasaun. Rezolusaun Governu ida-ne’e mós determina hodi taka kedas kursus doutoramentu ne’ebé la hetan autorizasaun ne’ebé la’o hela iha rai-laran.
Medida ida-ne’e sei tama iha vigór to’o konklui prosedimentu lejizlativu ne’ebé nesesáriu ba regulamentasaun kompleta ensinu superiór nian, ne’ebé permite halo avaliasaun hikas ba oferta kursu tuir nesesidade merkadu traballu no evolusaun setór edukativu nian.
loading="lazy" />