G-NEWS (HATUBUILICO) — Família ema ho defisiénsia hosi aldeia Querudo, Mulo, Hatubuilico, Ainaro, fila ba uma ho kondisaun di’ak hafoin halo tratamentu fulan ida iha HNGV-Díli. Antes ne’e sira hetan ona atensaun direta hosi Prezidente Repúblika, José Ramos-Horta, hafoin sira nia istória sai viral iha mídia sosiál.
Armando Amaral de Deus (49), ne’ebé sofre defisiénsia matan durante dékada rua, ho nia oan-feto Joselina de Deus, ne’ebé iha defisiénsia fíziku hetan kanek todan hafoin monu besik ahi-matan. Joselina nia kondisaun sai aat tanba hetan infesaun grave, enkuantu sira hela iha uma ne’ebé ladún iha padraun laiha eletrisidade.
Parteira Zélia da Silva de Jesus hetan sira no fó primeiru sokorru, hafoin fahe família nia kondisaun iha mídia sosiál. Prezidente Horta haruka kedas Unidade Servisu Apoiu Sosiál Prezidensiál atu evakua sira mai Díli.
Koordenadór Unidade Apoiu Sosiál, Teresa dos Santos Ximenes, konfirma katak Prezidente pesoalmente husu atu lori família ne’e ba ospitál hodi halo tratamentu kompletu. Agora, hafoin halo tratamentu, Armando no Joselina haruka ona ba uma ho kondisaun ne’ebé di’ak liu.
“Momentu ne’e, Excelência Prezidente Ramos-Horta manda mensajen urjente iha kalan ne’e kedas no dadersan ha’u kontaktu ho Doutór espesialista Prezidénte nian Dr. Ariel & Dra. Yasmin, hodi garante transporta médiku ba Avo Armando no nia oan feto Joselina iha Ainaro, nune’e ekipa desloka kedas ba iha HNGV-Dili” Relata Koordenadora Jerál Unidade Serbisu Apoiu Sosiál Prezidénsia, Teresa dos Santos Ximenes,
Durante estadia fulan ida iha Ospitál Nasionál Guido Valadares (HNGV), ekipa médiku halo operasaun katarata ba Armando Amaral de Deus no halo tratamentu ba nia oan-feto, Joselina de Deus tanba infesaun no kondisaun fíziku. Hafoin kuidadu intensivu, sira na’in rua oras ne’e di’ak no fila ona ba sira nia hela fatin iha Aldeia Querudo, Hatubuilico.
Parteira Zélia da Silva de Jesus, ne’ebé primeiru hetan sira nain rua iha dalan, agradese ba Prezidente nia laran di’ak ba sidadaun refere “Ha’u agradese tebes ba nai Prezidente José Ramos-Horta tanba ho nia domin tomak mak bele lori hikas sira nain rua mai fali iha ne’e, Avo Armando nia matan komesa hare fila fali ona no Josefina mos sa’ude diak loos ona”. Hateten Parteira Zelia iha Ainaro.
Prezidente José Ramos-Horta garante konstrusaun uma dignu ba Armando Amaral de Deus ho nia oan feto Joselina, nune’e sira bele moris ho dignu hafoin fila hosi tratamentu iha HNGV-Díli.
Governu lokál, liuhosi Superson Mendonça, simu sira-nia regresu ho ksolok no husu ba estadu atu kontinua fó prioridade ba família sira seluk ho defisiénsia iha Aldeia Querudo.
Nia nota katak uma-kain liu 30 maka sei moris ho kondisaun aat no laiha asesu ba eletrisidade.
loading="lazy" />