G—NEWS (INTERNATIONAL) — Israel hahú fali nia atake aéreu no bombardeamentu maka’as ba Faixa Gaza iha madrugada loron-tersa oras lokál, hodi marka fali nia kampaña jenosídiu nian hafoin fulan rua nia laran.
Bombardeamentu ne’e hamate pelumenus ema sivil palestinianu na’in 131 iha Gaza, no hakanek ema atus resin, inklui feto sira, labarik sira no katuas-ferik sira.
Atake ne’e ameasa mós vida hosi vítima sira ne’ebé atrapada iha edifísiu sira nia rahun ne’ebé estraga hosi atake israelita nian.
Tuir fonte lokál sira saúde nian, dadus inisiál sira hatudu katak maioria hosi ema sira ne’ebé mate mai hosi súl Gaza nian, ho vítima na’in 60.
Korrespondente WAFA nian konfirma katak pelumenus ema na’in lima, inklui labarik na’in rua, mate no sanulu resin hetan kanek tanba atake hosi forsa israelita sira hasoru tenda sira iha zona Mawasi, Khan Younis.
Sira ne’ebé hetan kanek iha atake ne’e evakua kedas ba Ospitál Kuwait Field ne’ebé lokaliza besik.
Entretantu, ema liu na’in 15, inklui labarik na’in lima, konfirmadu mate no liu na’in 20 seluk hetan kanek iha atake aéreu sira iha Sidade Gaza. Vítima sira lori kedas ba ospitál lokál.
Aleinde ne’e, ema kanek sanulu resin maka lori ona ba Ospitál Al-Awda iha Nuseirat, sentrál Gaza nian, hafoin atake aéreu sira kona kampu refujiadu sira Nuseirat no Al-Bureij iha área ne’e.
Responsável sira saúde nian hosi Ospitál Al-Awda fó sai pelumenus ema na’in 14 mate, inklui labarik sira, tanba atake sira hasoru kampu refujiadu rua iha súl Gaza nian.
Ema na’in 70 seluk hetan kanek. Barak hosi sira iha kondisaun grave tanba bombardeamentu ba uma sivíl sira iha ne’ebá.
Iha norte Gaza nian, pelumenus ema na’in ualu, inklui labarik na’in neen, mate iha bombardeamentu israelita nian ba kampu refujiadu sira Jabalia nian. Ema lubuk ida mós hetan kanek tanba atake hosi forsa sionista sira iha área sivíl hosi akampamentu.
Fonte sira seluk hatete katak ema lubuk ida maka hetan kanek iha atake israelita sira hasoru uma rua família nian iha zona Abasan Al-Kabira iha leste Khan Younis nian no hasoru tenda sira iha zona Muwasi nian.
Mate sira mós relata iha atake aéreu israelita ida hasoru eskola ida ne’ebé hela ba refujiadu sira iha área Al-Daraj, iha sidade Gaza, hafoin destruisaun ba uma tolu iha Tal Al-Hawa no sira seluk iha kampu refujiadu sira Al-Bureij no Nuseirat.
Ekipa salvamentu sira hasoru dezafiu boot sira hodi to’o iha área sira ne’ebé afetadu tanba atake aéreu no bombardeamentu sira ne’ebé la’o hela hosi forsa sionista sira.
Laloran violénsia ne’e marka retoma hosi jenosídiu israelita nian iha Gaza, ne’ebé maka suspende iha fulan rua ikus ne’e tanba akordu sesárfogu nian.
Eskalasaun ne’e akontese iha tempu ne’ebé iha preokupasaun sira kona-ba krize umanitáriu ne’ebé sai aat liu iha enklave palestinianu ne’ebé ho populasaun maka’as, ne’ebé sai aat liután tanba blokeiu israelita nian ba entrada hosi ajuda umanitáriu, inklui ai-moruk importante sira, iha Gaza.
loading="lazy" />