G-NEWS (DILI) – Joven timoroan ida, dadauk ne’e hetan kontratu hosi Klubu Indonézia PSIS Semarang Paulo Gali Freitas. Durante jogu, Paulo Gali Freitas koñesidu ho “Gali” sempre hatudu prestaun di’ak iha kampu laran. Bainhira “Gali” tun ba kampu, komentátor sempre temi “Gali” nia naran no ninia nasionalidade. Iha okaziaun ne’e, Timor nia naran sempre sai alvu ba jogador refere.
Timoroan sira ne’ebé akompaña Gali nia partisipasaun eventu desportu Nasionál Indonézia nian, sempre haksolok tanba Gali nia prezenta iha Indonézia lori mós Timor nia naran.
Jeferino Sequeira, hosi Munisípiu Likisa inform aba G-News (Segunda-Feira, 21082023) iha Merkadu Manleuana hateten, sente kontente tanba Jogadór Gali sempre hatudu prestasaun di’ak, no bele hamorin Timor nia naran iha eventu nasionál sira katak Timor mós bele.
“Ha’u sente kontente ho maun Gali nia prestasaun ne’ebé sempre pozitivu ba klube ne’ebé fo kontrata nia, maske nia pesoal mak esforsu iha kampu laran, maibé ida ne’e bele hamorin Timor nia naran, tanba ita akompaña iha televizaun, dalaruma Komentátor sempre temi Gali, no dehan katak hosi Timor Leste. Ida ne’e hanesan orgullu ida ba ita nu’udar Timoroan. Maun Gali ne’e mak joven ne’ebé hatudu ezemplu di’ak hodi lori Timor nia naran iha mundu. Ne’e éroi ba joven sira seluk”, hateten Jeferino.
Iha parte seluk, Elisanzela Mendonça, iha Kampung Baru informa, Joven sira tenke banati tuir Jogadór Gali nia prestasaun ne’ebé hatudu iha Internasionál hodi hamorin Timor nia naran.
“Ita agradese ba jogadór Maun Gali tanba nia bele hamorin Timor Leste nia naran liuhosi eventu desportu liu-liu iha Indonézia. Ne’e hanesan oportunidade di’ak id aba Joven sira seluk atu banati tuir”, hateten nia.
“Ita tenke agradese ba maun Gali tanba bele hamorin Timor nian. Tanba ne’e mak ita husu ba Joven sira seluk atu evita kria konflitus ka krime iha sosiedade nia leet, ida ne’e bele estraga Timor nia identidade, bele estraga mós Timor nia Kultura. Ita ukun án ona, di’ak ita buka atu aprende iha formasaun oi-oin atu Eleva ita hotu nia koñesimentu, hodi kontribui netik ba dezenvolvimentu nasionál, duke loron kalan maki ta kria konflitus, ne’e ita la manan buat ida, só ita lakon tenpu atu estraga ita nia futuru, ne’ebé tuir loloos future nabilan ne’e iha ita nia oin”, tenik Elisanzela.
Iha fatin seluk, iha Delta Elemloi, Gaspar Soares ba G-News mós sente kontente ho Jogador Paulo Gali ne’ebé konsege lori Timor nia naran, maske joven no sidadaun barak mak ladun tau interese atu bele fó apoiu másimu ba ninia prestasaun durante ne’e iha eventu desportu nível Internasionál.
“Ita hotu nu’udar Timoroan tenke fó parabens ba ita nia joven, ita nia maun-alin Paulo Gali, ne’ebé konsege hamorin Timor nia naran. Joven hotu-hotu tenke banati tuir. Labele loron kalan mak tuda malu, ataka malu ka provoka malu. Ha’u hanoin oportunidade atu partisipa iha atividade ka programa sira ne’ebé Governu kria, maibé ita rasik, joven sira mak la iha kbi’it atu partisipa. Ha’u sente triste ho ita nia maluk joven sira ne’ebé loron kalan mak tuda malu, oho malu, hana malu, Ha’u hanoin ida ne’e it abele estraga ita nia futuru”, Nia haktuir.
Sira mós husu ba Joven sira seluk iha Timor Leste atu kontinua banati tuir Jogadór Gali nia atividade desportiva ne’ebé nia envolve, nune’e bele hamorin Timor nia naran duke partisipa iha krime públiku hodi kria instabilidade iha sosiedade nia le’et. Tanba ne’e sira husu mós atu Joven sira kria ona Paz no estabilidade, hodi halakon tiha provoka malu, tanba ho Dame mak bele kontribui ba Dezenvolvimentu Nasionál.
Jornalista : Ekipa G-News
Editór Testu : Amito Qonusere Araújo
loading="lazy" />