G-NEWS (DILI) – Komandante Jerál PNTL Komisariu Jerál Polísia Henrique da Costa, liuhosi konferénsia imprensa, segunda-feira (19022024) esplika kronolójia tiru elementu Forsa Armada F-FDTL iha Likintae ninian mosu insidente ida iha ne’ebá.
“Ne’ebé mak mosu uluk ninia provokasaun ne’e antes hosi merkadu Taibesi ninian mai, tanba iha motor ida ne’ebé tula ema na’in rua liuhosi área merkadu Taibesi nian, kontra Regras Tránzitu iha ne’eba, entaun nia tenta atu fó hanoin maibé iha tempu ne’ebá la konsege, entaun nia kontinua halo viajen mai to’o iha Likintai ninian, hafoin mosu provokasaun iha ne’ebá”, haktuir Komandante Jerál PNTL ne’e.
Komisáriu Jerál Polísia Henrique da Costa esplika tán, hosi situasaun ne’e, membru Polísia tenta atu aviza ba joven na’in rua refere no nia hasai pistola hodi tiru adverténsia ka fó atensaun katak ne’e autoridade seguransa, hafoin nia tiru ba alkatraun mak kartus haksoit sae kona joven na’in rua.
Tuir líder másimu Komandu-Jerál PNTL ne’e katak, kuandu família sira lori ba óspital mak identifika entre joven na’in rua ne’e ida ne’ebé tur iha kotuk nu’udar membru F-FDTL hosi komponente Naval.
“Hafoin ida ne’e, ita orienta kedas parte Investigasaun Kriminal Nasional hala’o kedas nia prosesu servisu hodi buka tuir autor, no mais ou menus iha oras tuku 10 dadersan, autor ne’ebe hanesan membru PNTL ne’e, nia mai entrega ann kedas iha Komandu Jerál, parte Investigasaun Kriminal Nasional kontinua kedas ho ninia prosesu, tanba ne’e ita nia Departamentu Investigasaun Kriminal Nasional komunika kedas ho Prokurador hodi hetan orientasaun ba prosesu ne’e rasik ne’ebe regista ho Númeru Úniku Kriminal (NUK) ninian Nuk 040/2024, ita hein orientasaun husi Ministeriu Públiku (MP) bainhira maka ita bele aprezenta ba MP atu nune’e prosesa”, hatutan Komisariu Jerál Polísia ne’e.
Autoridade másimu Instituisaun Seguransa ne’e afirma tan katak, membru Polísia refere agora dadaun detein iha sela Detensaun Komandu PNTL munisipiu Dili ninian tuir prosesu ne’ebé mak iha.
“Laos ida ne’e de’it maibé ita mós orienta ona Investigasaun Konjunta husi parte Disiplina ninian ne’ebe maka envolve Diresaun Nasional Justisa no Disiplina PNTL ho mós parte Disiplina Forsa Defesa ninian, sira halo inkéritu konjunta. Tanba ne’e husu ba públiku atu nune’e labele fó fila fali komentariu negativu katak Polísia tiru Forsa, maibé lalos hanesan ne’e. Ita Polísia ho Forsa, sempre kompleta malu, hafoin ne’e ha’u kontaktu kedas ba Xefe Estadu Maíor Jeneral tanba ita iha komunikasaun di’ak no Xefe Estadu Maíor Jeneral mós orienta ona ba iha Superior sira iha base atu kontrola no hakalma membru sira tanba ninia prosesu ne’e lao hela”, haktuir Komisáriu-Jerál PNTL ne’e.
“Tanba ita lakoi fó komentáriu ruma, sem iha desizaun ka rejultadu hosi parte judisial sira nia kompete2nsia, tanba ne’e ita sei la defende buat ida maibé ita hakarak hatu’ur katak buat hotu-hotu lao tuir ninia prosesu, tantu kriminál no mós disiplinar ninian, ida ne’e sai hanesan atensaun ba ami oinsa atu nafatin organiza ka orienta liu-liu oinsa uza armas no kontrola armas ninian ba iha ami nia membru sira hotu, tanba arma sai hanesan ekipamentu ne’ebe maka kompleta servisu Polísia ninian no nia mós bele fó perigu ba ema seluk nia vida, fó mós perigu ba ita nia vida entaun treinamentu no kontrola ba ami maka sai hanesan atensaun másimu”, Komisáriu-Jerál PNTL ne’e hakotu.
To’o informasaun ne’e fó sai, G-News seidauk hetan informasaun klaru hosi vítima membru forsa Armada F-FDTL soldadu Abrão do Rego Smith, tanba vítima sei iha faze deskansa nia laran.
Editór Testu : Amito Qonusere Araújo
loading="lazy" />