G-NEWS (DILI) – Ohin komandu FALINTIL-Forsa Defeza Timor-Leste (F-FDTL) liu husi komandu Komponente Naval F-FDTL ohin hasai membru Komponente Naval nain rua iha instituisaun F-FDTL bá vida Silvil Liu husi parada primeira semana bá Fulan Setembru nian.
Serimónia hapara membru FALINTIL-FDTL nain rua ne’e bazea bá despaisu husi Xefe Estadu Maior Jenerál FALINTIL-Forsa Defeza Timor-Leste (F-FDTL) Tenente Jenerál Falur Rate Laek, kontra Militár nain rua tamba viola regulamentu disiplina Militár iha artigu 4 n0 2.
Komandante Komponente Naval Comodoru Higino das Neves hatete, Instituisaun Forsa Defeza Timor-Leste (F-FDTL) la permite no lakoi iha institusaun FALINTIL-FDTL iha situasaun ruma se kilat bá malu, tanba sira nain rua tama iha Forsas Armadas jura bá Bandeira atu mate hamutuk no moris hamutuk, komprimisiu Forsas Armadas nian moras karik moras hamutuk hamlaha karik hamlaha hamutuk, oinsá bele asegura no ajuda malu iha tempo defisil nia laran, maibé sira nain 2 fó kanek bá Instituisaun no Família tanba ne’e mak Xefe Estadu Maiór Jenerál F-FDTL hasai despaixu hodi hasai Membru F-FDTL nain 2 Sub-Tenente no Gurmete tanba komete Adulteiro.
“Ita triste tanba hamenus ita nia ema, wainhira Militár sai husi ita nia le’et hanesan família bo’ot ne’ebé ita hari ho kosar no terus hamutuk maibé ita tenke husik sira, la’os tanba ita mak lahadomi sira maibé sira nain rua mak lahadomi ita.” Dehan Komandante Komponente Naval Comodoru Higino das Neves iha Komponente Naval Hera.
Comodoru Esplika Sub-Tenente inisial (SRC) fó kanek bá nia fen ho nia oan no Gurmete ho inisial (S) fó kanek bá nia laen tanba Gurmete inisiail (S) nia laen mós iha Forsas Armadas ho ida ne’e mak sira nain 2 estraga ambiente Forsas Armadas liu-liu Komponente Naval ne’ebé hari ho Sakrifísiu.
“Tan deit sira nain rua nia hahalok fó kanek bá malu, loron ruma membru sira bele se kilat bá malu instituisaun la permite no la tolera aktu sira ne’e, maske ita triste no ita hadomi sira nain rua maibé vale apena sira tenke sai husi ita nia sorin duke hamutuk ho ita para loron ida ita ho ita bele estraga malu, ida ne’e sai hanesan lisaun ida bá Forsas Armadas tomak.”
Husu bá Forsas sira hotu ohin le nia dever halo saida, sala ida ne’ebé Sub-Tenente halo ne’e kontra nia dever ho obrigasaun no babain hasai membru ho separasaun servisu agora tenke halo mudansa wainhira membru ne’ebé nia hahalok ne’ebé komete artigu ho aline ida ne’ebé nia komete tenke hasai atu nune’e bá futuru membru sira labele komete tan eru sira ne’e.
“Ohin loron ita servisu hamutuk atu kuidadu ho Dignidade família Komponente Naval nian ne’ebé hari mai husi FALINTIL, ne’ebé trasa mai husi povu maubere-oan, tanba FALINTIL mak aliserse bá Forsa Defeza Timor-Leste (F-FDTL) atu hatutan FALINTIL nia lala’ok tanba ne’e mak se deit mak tama Forsas Armadas ita sai família bo’ot Komponente Naval.”
“Hau hanesan Komandante Komponente hau hadomi imi hotu maibé membru sira tenke kria ambiente ne’ebé diak labele kria ambiente ne’ebé halo ita nia Instituisaun FALINTIL-FDTL la gosta malu ne’e ladiak, tanba ita kompromete atu mate ka moris hamutuk tanba hahalok ne’ebé Sub-Tenente ho Grumete halo ne’e ladiak, tanba ne’e mak ohin Instituisaun FALINTIL-FDTL hasai sira nain rua husi Instituisaun FALINTIL-FDTL tanba sira komete Adulteiro (selinku) iha institusaun nia laran.”
loading="lazy" />