G-NEWS (DILI) – Segunda-Feira (04122023) Kompanhia Milka Hohlau, selu ona PHK (Pemutusan Hubungan Kerja) ka Rescisão de trabalho ba traballador Nelson da Costa Lopes ho válor osan dollares amerikanu 370, kompostu hosi PHK U$ 230.00, lisensa anual U$ 30.00, gaji-13 hamutuk U$ 57.50, Over time U$ 20.00.
Hafoin mosu dezentendimentu entre traballador ho na’in ba kompanha Xineza kona-ba subsidiu seguransa nian, ikus mai Xineza sira komunika ho parte KSTL hodi halo mediasaun iha edifísiu Kompanha Milka Surikmas Dili.
Dezentendimentu ne’e akontese hafoin G-News halo publikasaun no halo entrevista ba traballador no Xineza, iha segunda-feira dáder, no iha meúdia tuku rua, parte rua halo mediasaun ne’ebé lídera hosi KSTL.
Tuir deklarasaun ba mediasaun entre SJT-TL ho Kompanhia Milka Hohlau, iha duni rejultadu tanba kompanha selu kedan PHK ba traballador ne’e.
Durante iha mediasaun, traballador Nelson ejiji ba kompanha atu selu direitu seguransa nian, maske kompanha la fó kontratu administrativa.
Vise Prezidente Konfederasaun Sindikatu Traballador Timor Leste (SJT-TL) Berta Ornai Neto hateten, SJT-TL prontu apoiu nafatin traballador timoroan sira ne’ebé servisu iha Kompanha Xineza.
“Iha lei, tenke tuir lei, katak tenke iha kontratu. KSTL prontu nafatin atu ajuda traballador timoroan sira”, Berta konfirma ba G-News.
Tuir akordu hamutuk, Sindikatu Jerál Trabalhadores Timor Leste (SJT-TL) nian sita katak, problema konsidera resolvido ona iha ne’e, no sei la levanta tán problema ne’e ba oin no futuru mai.
“Ami hotu konkorda ho akordu ida ne’e sai hanesan baze legál ida ba parte rua hanesan traballador ho empregador, ne’ebé asina direita hosi empregador Yuan Huang, traballador Nelson da Costa Lopes no Mediasaun hosi SJT-TL Berta Ornai Neto.
Jornalista : Ekipa G-News
Editór Testu : Amito Qonusere Araújo
loading="lazy" />