G-NEWS (DILI) – Bainhira iha tenpu udan, transporte públiku no privadu sira ne’ebé atu hala’o viajen ba munisípiu Aileu, Ainaro, Manufahi no Covalima, di’ak liu tuir estrada tuan hosi Dare ba Aileu.
Tuir pasajeiru ida, Florindo Soares, ne’ebé G-News hasoru iha mota Casnafar Sábadu (16122023) hateten, di’ak liu transporte roda rua no roda hat labele liu estrada foun bainhira iha tenpu udan, tanba air terjun iha Fatisi ameasa movimentu transporte privadu no públiku sira iha tenpu udan.
“Ita lalika abuja natureza. Kuandu tenpu udan di’ak liu lalika liu estrada foun. Ha’u haree iha udan mós ita nia populasaun sira barak tenta atu liu estrada foun, ne’e hanesan ita abuja, kecuali la udan ne’e di’ak”, Florindo Soares informa ba G-News.
Iha parte seluk, motorista ida Mario Gomes, ba G-News, iha Lahane, atu hala’o viajen ba munisípiu Covalima hateten, iha tenpu udan, nia liu estrada antigun maske lao dook tanba udan, nia parte tauk liu estrada foun tanba korente bee iha air terjun boot.
“Ha’u la liu iha estrada foun, tanba udan hela ne’e maun. Tanba de’it hakarak to’o lalais maibé ita la hatene ita nia distiñu mós importante. Ita abuja natureza, udan mós ita hakarak hakat, mak mota lori transporte, se mak atu responsabiliza, ida ne’e mak ita tenke tau iha ita nia ne’on”, nia esplika ba G-News.
Tanba ne’e, nia parte husu ba sidadaun sira ne’ebé ho transporte privadu no públiku sira atu labele brani demais liu nafatin estrada foun tanba de’it besik no hakarak to’o lalais, tanba insidente sei la espera, nune’e iha tenpu udan, tenke antisipa.
“Ha’u husu ba sidadaun tomak, maluk Timoroan sira, atu labeoe brani demais atu liu iha estrada foun. Insidente ne’e ita la espera, di’ak liu tenpu udan hanesan ne’e, lao tuir de’it estrada antigu maske dook no kleur maibé bele salva. Di’ak liu halo antisipasaun duke akontese ona mak hakfodak, maibé ne’e ita sakrifika ita nia distiñu”, nia hakotu.
Tuir observasaun G-News, maske udan iha kapitál Dili no parte munisípiu Aileu nian, to’o mai iha área Fatisi nian, maibé transporte públiku no privadu sira kontinua hala’o movimenta normal.
Jornalista : Ekipa G-News
Editór Testu : Amito Qonusere Araújo
loading="lazy" />