G-NEWS (DILI) – Sekretáriu Estadu Komunikasaun Sosiál (SECOMS) ho redasaun no editór sira hosi mídia Estatal no mídia privadu, kinta-feira (16052024), iha salaun enkontru Vise-Ministru Assuntus Parlamentares, Pálasiu Governu, kona-ba preparasaun ba komemorasaun loron nasionál restaurasaun independénsia, loron 20 fulan-Maiu tinan 2024, ne’ebé lídera hosi Diretóra Diresaun Nasionál Dezeminasaun Informasaun (DNDI), SEKOMS-PCM Deonaia da Silva.
Iha komemorasaun ba loron restaurasaun independénsia ne’e, iha mós delegasaun espesiál hosi nasaun bilateral sira iha mundiál, inklui mós iha nível rejionál.
Hosi nível rejionál, iha bainaka espesiál ida, liurai Brunei-Darussalam, ne’ebé hala’o vizita ofisial hodi partisipa iha komemorasaun ba loron restaurasaun Independénsia, loron 20 fulan-Maiu tinan 2024.
Liurai Brunei-Darussalam, asume kargu nu’udar Prezidente Repúblika, Primeiru-Ministru, Ministru Negósiu Estranjeiru no Kooperasaun, Ministru ba asuntu Ekonomia no Finansas, no Komandante supremu forsa armada, ho naran kompletu Hassanal Bolkiah Mu’izzaddin Wad’daulah ibni Omar Ali Saifuddien Sa’adul Khairi Waddien, ka koñesidu Hassanal Bolkiah.
Liurai Hassanal Bolkiah, mak sei sai pilotu ba nia viajen ho aviaun privadu, ne’ebé sei to’o iha Timor Leste, iha loron 20 fulan-Maiu, akompaña hosi Ministru na’in tolu, no nia oan mane ida.
Bainhira to’o Timor, Liurai Brunei-Darussalam, nu’udar mós Prezidente Repúblika, Primeiru Ministru, Ministru Negósiu Estranjeiru no Kooperasaun, Ministru ba asuntu Ekoomia no Finansas, no Komandante supremu forsa armada, sei simu kondekorasaun hosi Estadu RDTL, âmbitu komemorasaun istóriku ne’e.
Tuir ajenda ne’ebé iha, Liurai ne’e sei to’o iha aeroportu Internasionál Nicolau Lobato iha dáder, kontinua ba deskansa iha ninia embaixada, hafoin minutu hira kontinua ba Pálasiu Predensial bodi partisipa komemorasaun loron 20 fulan-Maiu, ba restaurasaun Independénsia, depois ida ne’e kontinua kedan ba enkontru ho Xefe Governu, depois kontinua vizita Ponte BJ Habibie, kontinua kedan ba Meskita Annur, no ikus sei ba ponte Dili, hodi observa nune’e ba planu investimentu iha futuru.
Hafoin vizita ba pontu sira ne’ebé ajenda ona, Liurai Brunei Hassanal Bolkiah, sei fila ba nia rai iha lorokraik, no ninia ekipa tomak.
Editór Testu : Amito Qonusere Araújo
loading="lazy" />