G-NEWS (DILI) – Ministériu Edukasaun hamutuk ho parseiru Millennium Challenge Coorporation (MCC) diskute kona-ba formasaun ba professor sira iha futuru.
Ministra Edukasaun, Dulce de Jesus hatete, Objetivu enkontru ho organizasaun MCC nu’udar kontinuasaun iha area formasaun ba manorin na’in sira.
“Sei hakarak hari’i fatin ida ne’ebé mak profesor sira hetan formsaun ho kualidade di’ak no mós ami hanoin katak, posibilidade iha sentru formasaun liga ho eskola ruma, atu nune’e banhira formasaun, aumesmu tempu profesor sira mós bele hala’o prátika iha area eskola sira”, dehan Dulce ba jornalista sira iha iha salau VIP ME Kinta (26/10).
Nia dehan, formasaun ida ne’e ohin rua, ida ba profesor sira ne’ebé hanorin tiha ona, no ida mós kandidatu ba futuru profesores sira ka ema ne’ebé atu sai profesor, nia tenke iha preparasaun di’ak no iha formasaun di’ak, atu nune’e nia bele tama ba iha forsa de traballu Ministériu edukasaun.
“Formasaun espesífiku mak ba metolójia ensinu, oinsa mak atu hanorin atu sai profesor, ema ne’e kuandu atu mai, nia atu hanorin matemátika, nia tenke graduadu iha area matemátika no depois reforma nia para atu sai profesor ida atu hanorin dixiplina ne’ebé didi’ak liu–tán”, dehan nia.
Iha fatin hanesan, Diretór Ezekutivu Compact Development Team Timor-Leste (CDT-TL) Embaixadór Constâncio Conceição Pinto hatete, MCC no ME iha objetivu ida atu forma professor sira ida mak lingua, lideransa jestaun ba eskola nian, nune’e mos IT.
“Ita hakarak transforma ita nia profesor sira ne’e ba sékulu XXI nian, para utiliza teknolójia ne’ebé mak iha”, dehan Constâncio.
Constâncio afirma tán, formasaun ba Professor sira iha Timor laran tomak, inklui Professor sira hosi fakuldade, ensinu nian hotu iha UNTL no mós ba Professor sira ne’ebé mak agora dau-dauk hanorin hela.
“Banhira atu realiza ne’e seidauk hatene, tanba prosesu naruk ida, agora dau–daun ami buka hela rai atu bele hari’i sentru nune’e haree mós fatin ne’ebé fo formasaun ba Professor nian, se buat hotu-hotu lao di’ak iha tinan 2025 ne’e sei komesa”, Constâncio hakotu.
Jornalista : Ekipa G-News
Editór Testu : Amito Qonusere Araújo
loading="lazy" />