G—NEWS (DILI) — Timor-Lesre nee iha hela paz nia laran, maibe ukun mak lalos, halo povo terus no ukun nain sira aproveita vantagem diak ba sira nia moris diak no família nia moris diak. Ida nee mak marka diferença bot agora entre ukun nain sira CNRT, PD ho opozisaun FRETILIN.
Hanesan dirigente politico hau la fo garantia paz tamba paz nee depende husi ema ida ida no too ema hotu-hotu nia necessidade atu fo moris hakmatek ba ita nia moris rasik no ba ita nia rai. Timor-Leste rai kikoan ida, metade ilha Timor husi parte oriental halo nia historia ida nebe timoroan hotu hotu orgulha no sei orgulha nafatin tamba halo funu hasoru Indonésia jigante bot iha sudeste Asiático too nia lakon funu ho ita, ho exercito guerrilha ida kiik durante tinan 24 nia laran! Referencia historica ida nee halo mundo tomak mos hakfodak oinsa resistência Timor-Leste bele halo funu, oinsa resiste no sustenta funu too manan?!
Orgulho ida nee mk dala barak lori hau, no lori ita hotu hametin ita nia fiar hateke ba futuro ho esperansa nafatin, hametin paz no halao desenvolvimento ida sustentavel ba ita nia rai. Husi sorin seluk, atu hametin paz liu tan precisa rekonhece saida mak ita halo tiha ona no saida mak ita seidauk halo, hafoin ita Restaura Independencia Nacional.
Dala barak politicos sira kontente deit ho demokracia, ho liberdade atu konkorre no konkista poder no halo exercicio de oportunidades, maibe laiha sentido de Estado nudar servidor povo no garante moris digno ba povo tomak! Atu hametin paz la signifika partidos hotu-hotu tenki fahe kadeiras ba malu, maibé tenki hametin mk sira ida ida nia kompromissos politiko ho povo no ukun tuir sistema no ho plano no programas politicos loloos. Labele horseik koalia buat ida, ohin halo buat seluk.
Labele bosok Povo! Labele halo drama politico ho sentido karismátiko falso ida hodi fo deit ilusaun ba ema barak nebe neon sei mukit atu entende realidade ho nia sentido pragmátiku!
Lider tenki eduka nia povu atu hatene partisipa ida desizaun hotu-hotu kona ba ukun! Ida nee presiza kria mekanismu oinoin atu povu bele sente katak nia mak ukun duni nia an, nia mak nia rai no nain loloos ba ukun an!
Atu hametin paz lideres no politikos sira tenki hatene loloos katak Estado nee ukun ho kontinuidade, governo ida tun, ida sae uza rekursu Timor-Leste nian hodi implenta política nebe dehan too 2030 ema hotu-hotu iha nia rendimento rasik hodi garante estabilidade ba sira nia moris diak, ema hotu2 sei hetan saúde diakk, edukasaun ho kualidade dk, etc…maibe realidade hatudo oinseluk! Osan barak ita gasta tinan 20 resin hatudo katak ita halo desperdicio boot em vez de resultados! Nee tamba ida ukun uluk, ida seluk ikus sobu tuituir. Laiha garantia atu hametin desenvolvimento,cidadaun sira lakon konfiança ba nia ukun nain sira no ema rai seluk la fiar katak TL bele garante investimento ho certeza no ho segurança ba sira nia projetos investimento.
Atu habadak deit hau dehan: Atu garante paz precisa ukun nebe kaer ukun hatene halo diálogo, kurriji hanoin no hahalok sala hodi sai ba diak, onesto, íntegro no matenek hatene resolve problemas no ukun tuir sistema no fo konfiança ba nia povo tomak!
Atu ramata ha’u nia mensagem nee katak 20 de maio 2025 ita kompleta ona tinan 23 ukun rasik an loloos. Estado nebe ita hari nia base mk Konstituisaun RDTL hodi define organizasaun poder Estado nian no na’in sira halo exercício poder político ho respeito nafatin principios separasaun no interdependencia de poderes entre orgaun de soberania sira hotu atu evita koncentrasaun poder ukun nian iha ema ida nia liman. Ukun nune, ukun sei respeita nafatin direitos, liberdades, no garantias fundamentais ema hotu-hotu nian. Tinan 23 nafatin ita apela ba malu: Hametin Estado de Direito Democrático no halao desenvolvimento sustentavel ba ita nia rai no ba ita Povo TL.
Viva 20 de Maio de 2002 —2025!
Viva Timor-Leste independente!
Viva 20 de Maio 1974—2025!
Honra no Glória ba Heróis sira!
Díli, 19.05.025
loading="lazy" />