G-NEWS (INTERNATIONAL)— Prezidente Universidade Columbia nian, Minouche Shafik, husik kargu fulan hirak hafoin protestu sira kona-ba funu Israel-Hamas nian ne’ebé hale’u kampus, tuir karta ida ne’ebé haruka hosi Shafik ba komunidade Columbia nian ne’ebé hetan hosi CNN no konfirma hosi porta-vós universidade nian.
Shafik — ekonomista ida ne’ebé moris iha Ejitu no eis-ofisiál aas iha Banku Mundiál, Fundu Monetáriu Internasionál no Banku Inglaterra nian, no eis-prezidente Eskola Ekonomia Londres nian — hasoru ona presaun tanba nia manejamentu ba akampamentu sira iha kampus Columbia nian ne’ebé protesta hasoru funu entre Israel no Hamas.
Shafik iha nia karta iha loron-kuarta ne’e sita progresu durante nia mandatu maibé hatete katak “ne’e mós períodu ida ne’ebé maka susar atu ultrapasa pontu-de-vista sira ne’ebé la hanesan iha ami nia komunidade tomak.”
“Períodu ida-ne’e lori impaktu konsideravel ba ha’u nia família, hanesan mós ba ema seluk iha ami nia komunidade,” Shafik hatete iha karta. “Durante bailoron, ha’u bele reflete no deside ona katak ha’u nia avansu iha pontu ida-ne’e sei permite di’ak liu ba Columbia atu atravesa dezafiu sira iha oin.”
“Ha’u koko ona atu la’o iha dalan ida ne’ebé maka tane aas prinsípiu akadémiku sira no trata ema hotu ho justisa no kompaixaun. Ida-ne’e sai hanesan laran-susar—ba komunidade, ba ha’u nu’udar prezidente no iha nivel pesoál—atu hetan ha’u-nia an, kolega sira, no estudante sira sai hanesan sujeitu ba ameasa no abuzu sira,” Shafik hatete.
Ivy League lista Katrina Armstrong hanesan Prezidente interinu, tuir universidade nia website.
Krítika sira kona-ba protestu sira iha kampus
Shafik hetan krítika tanba nia maneja protestu sira iha kampus tanba funu Israel-Hamas. Antes inísiu universidade tomak ne’ebé sei hala’o iha loron 15 fulan-Maiu, Shafik alista ekipa ida hosi líder akadémiku sira hodi negosia ho reprezentante sira hosi “Akampamentu Solidariedade Gaza nian” iha kampus. Maibé, sira la konsege hetan rezolusaun ida ne’ebé sei rezulta iha estudante sira sai hosi akampamentu iha gramadu universidade nian iha ne’ebé serimónia sira inísiu Columbia nian tradisionalmente akontese, Shafik anunsia iha komunikadu ida iha loron 29 fulan-Abril.
Hafoin konversa sira hotu, estudante sira no mós ema sira ne’ebé la iha afiliasaun ho Columbia tama iha Hamilton Hall, edifísiu akadémiku prinsipál ida iha kampus, no taka sira-nia an iha laran. Ne’e dudu Shafik atu husu asisténsia hosi Departamentu Polísia Nova Iorke nian iha loron 30 fulan-Abril hodi hasai manifestante sira ne’ebé okupa edifísiu ne’e aleinde akampamentu.
Iha totál, NYPD hatete katak sira kaer manifestante na’in 300 resin iha kalan ne’ebá iha Columbia no viziñu City College. Shafik mós husu ba NYPD atu hela iha kampus to’o pelumenus loron 17 fulan-Maiu “hodi mantein orden no asegura katak akampamentu sira la estabelese fali,” nia hatete iha nia karta iha loron 30 fulan-Abril ba NYPD.
“Eskalasaun drastiku” iha Hamilton Hall “dudu Universidade ba rohan,” Shafik hatete iha karta ida iha loron 1 fulan-Maiu.
“estudante sira no ativista sira hosi li’ur ne’ebé sobu odamatan Hamilton Hall nian, trata aat ami nia ofisiál sira Seguransa Públika nian no pesoál manutensaun nian, no estraga propriedade sira maka hahalok destruisaun nian, la’ós diskursu polítiku nian,” nia hatete. “Ha’u hatene katak ha’u ko’alia ba membru barak hosi ami nia komunidade hodi hatete katak mudansa akontesimentu sira-ne’e halo ha’u sente triste tebes. Ha’u deskulpa ita to’o iha pontu ida-ne’e.”
Kapturasaun sira akontese semana ida hafoin Shafik inisialmente autoriza NYPD atu kaer manifestante liu 100 ho akuzasaun preliminár ba infrasaun kriminál loron ida hafoin akampamentu ne’e lansa iha loron 17 fulan-Abril.
Iha loron ne’ebá Shafik fó sasin iha Komité Edukasaun Kámara nian kona-ba universidade nia manejamentu ba antisemitizmu. Shafik hatete ba deputadu sira katak nia kondena profesór oioin nia deklarasaun sira ne’ebé halo hodi apoia atake Hamas nian iha loron 7 fulan-Outubru, ne’ebé rezulta iha demisaun pelumenus profesór ida, Mohamed Abdou, iha konkluzaun semestre nian.
Iha esforsu ida atu evita destinu sira hosi prezidente Ivy League na’in rua seluk iha Harvard no Universidade Pennsylvania nian, ne’ebé rezigna-an hafoin sira nia audiénsia kongresu dezastroza iha fulan-Dezembru kona-ba antisemitizmu, Shafik tuir informasaun prepara ona durante fulan barak ba nia sasin. Nia mós hatete ba deputadu sira katak apelu sira ba jenosídiu ba ema Judeu sira viola kódigu konduta universidade nian, ne’ebé maka eis-prezidente sira Harvard no UPenn nian la halo.
Maibé, deputadu balu haree katak nia resposta sira la sufisiente no husu nia kona-ba tansá maka la foti asaun sira ne’ebé desizivu no oportunu liu hasoru profesór sira no mós estudante sira ne’ebé alegadamente hola parte iha aktu antisemitizmu nian.
Fonte : Informasaun CNN
loading="lazy" />