G-NEWS (DILI) — Relasiona ho informasaun ne’ebé espalla iha públiku katak, governu no igreja sei deside hodi halo limitasaun ba sarani sira nia partisipasaun iha selebrasaun eukaristia, ne’ebé dirije husi Santu Padre Francisco, iha Tasitolu, Dili, iha loron 10 fulan-Setembru tinan 2024.
Tuir komunikadu imprensa Tanba ne’e, Arsebispu Arkidioseze Metropolitana Dili, Dom Virgilio Kardeál do Carmo da Silva, klarifika ba públiku katak, rejistu ne’ebé daudaun ne’e hala’o iha kada Parókia sira, la’ós atu limita sarani sira partisipa misa boot iha Tasi-tolu.
Dom Virgilio Cardeal do Carmo hateten Sua Santidade Papa Francisco mai ba ema hotu, rejistu ne’ebé halo la’ós atu limite, rejistu hodi bele hatene sarani sira tun husi munisípiu mai presiza prepara transporte, inklui meius oinsá mak bele tama mai, atu nune’e bele hatene sukat espasu ne’ebé prepara iha Tasi-tolu nian kada munisípiu ema na’in-hira, para ita-nia sarani sira mós tau tuir ida ne’e.
“Rejistu la’ós atu limita, rejistu para atu kontrola no organiza di’ak liután. Kona-ba idade katuas ka ferik la fó limita, maibé depende, se ha’u ho idade haat-nulu (40) mak ha’u moras, ida-idak tenke hatene ninia án, se nia moras duni nia labele mai, maibé se idade limanulu-resin-sia (59) ka neenulu (60) dehan katak nia forte hela, loron tomak bele aguenta iha tasi-tolu, aguenta ho rai rahun no kosar, entaun ida-idak mak responsavel”, haktuir husi Dom Virgílio Kardeál do Carmo da Silva.
Kardeál do Carmo da Silva mós husu bai nan-aman sira, ne’ebé lori bebé ba partisipa misa, atu kuidadu no proteze an husi rai-rahun, loron manas nune’e labele afeta ba bebé nia kondisaun.
“No ba Bebé sira, inan ho aman sira mak tenke hatene oinsá atu lori, tanba iha ne’ebá ita hatene katak ema barak, rai manas no dudu malu, entaun ema ne’ebé ba iha ne’ebá naran katak ema ne’ebé forte no bele aguenta, nia bele ba”.
Dadauk ne’e, kada Pároku sira iha territóriu tomak hahú loke ona rejistrasaun ba sarani sira ne’ebé atu partisipa selebrasaun Eukaristia ne’e, inklui mós iha kapitál Dili.
Editór Testu : Amito Qonusere Araújo
loading="lazy" />