G—NEWS (DILI) — Zebra Cross nu’udar elementu importante iha infraestrutura rodoviária ne’ebé dezeña atu proteje ema la’o ain, dalabarak kondutór veíkulu motorizadu sira la hetan apresiasaun. Maski sai hanesan instrumentu importante ida hodi regula tráfiku no fó prioridade ba ema la’o ain, kondutór barak maka seidauk komprende didi’ak objetivu loloos hosi kruzamentu zebra cross nian, ne’ebé hamosu ameasa ba seguransa ema la’o ain nian.
Elizario Ximenes nu’udar akadémiku husi Universidade Nasionál Timor Leste (UNTL) esplika, falta komprensaun ne’e mosu tanba fatór oioin. “Motorista sira dalabarak trata zebra cross hanesan de’it sinál seluk iha estrada, la hanoin katak sira maka direitu ema la’o ain nian atu atravesa ho seguru,” Ximenes hatete iha entrevista ho G—NEWS, sesta-feira (2102025) ne’e, iha Kampus Sentral UNT. Nia hatutan, fenómenu ida-ne’e dalabarak akontese liu-liu iha área besik eskola.
Ximenes ko’alia liután katak, kondutór sira-nia indiferensa ba zebra cross mós kauza hosi falta konxiénsia tránzitu no aplikasaun lei ne’ebé rigorozu. “Iha nasaun barak inklui Timor Leste maske regulamentu iha ona maibé implementasaun legál no konsiensia públiku sei menus,” nia hateten.
Aleinde ne’e, Orlando Gomes, sidadaun ida ne’ebé ko’alia ba G—NEWS, iha Colmera katak, indiferensa ba zebra cross ne’e la’ós de’it kestaun edukasaun maibé mós hahalok ne’ebé forma hosi ábitu. “Dala barak, kondutór sira sente ansi liu no ignora importánsia atu fó dalan ba ema la’o ain sira. Ida ne’e sai hanesan toman ida ne’ebé perigozu, liu-liu iha estrada ne’ebé movimentadu,” Gomes esplika.
Impaktu hosi ignora zebra cross sira klaru tebes, nomeadamente aumentu iha asidente tránzitu sira ne’ebé envolve ema la’o ain sira.
Medida edukasaun nian ne’ebé intensivu liu ba kondutór presiza implementa kedas. Ida-ne’e bele iha forma kampaña seguransa rodoviária nian ne’ebé maka frekuente liu, no mós treinamentu ba kondutór potensiál sira atu komprende importánsia atu respeita direitu hosi ema la’o ain sira.
“Presiza iha sinerjia entre autoridade, komunidade no instituisaun edukasionál hodi kria konxiénsia kona-ba importánsia atu respeita zebra cross. La ho ida ne’e, númeru asidente sei aumenta nafatin”, tenik Gomes.
Kondutór sira nia falta komprensaun kona-ba zebra cross no direitu ema la’o ain nian maka kestaun boot ida ne’ebé presiza atu rezolve kedas. Aumentu konxiénsia, edukasaun tránzitu no aplikasaun lei ne’ebé rigorozu liu sei sai xave atu kria estrada ne’ebé seguru liu ba utilizadór estrada hotu, liuliu ema la’o ain. Iha tempu naruk, ida-ne’e bele ajuda hamenus númeru asidente no hadi’a seguransa rodoviária.
loading="lazy" />