G-NEWS (DILI) – Eis Vise-Primeira-Ministra, no Ministra Solidariedade Sosiál no Inkluzaun (MSSI), iha Oitavu Governu Konstitusionál, Armanda Berta dos Santos, atuál Prezidente Partidu KHUNTO, dáder ne’e, ba presta deklarasaun iha Polícia Cientifica Investigação Criminál (PCIC), ho líder Supremu Partidu Kmanek Haburas Unidade Nasionál Timor Oan (KHUNTO) José dos Santos Naimori Bukar, tanba iha ligasaun ba administrasaun Partidu nian,, maibé advogadu Privadu Arnaldo da Costa Lopes, lakohi fó informasaun klaru kona-ba ninia kliente nia objetivu prinsipal ba presta deklarasaun iha PCIC, ba Mídia tanba segredu justisa.
Hafoin sai tiha hosi fatin presta ka identifikasaun no deklarasaun iha edifísiu PCIC, tuku sanolu ho balun dáder oras Timor Leste, Armanda Berta do Santos no José dos Santos Naimori Bukar, fase kedan liman iha odamatan liur, ne’ebé akompaña hosi Advogadu no ekipa sira.
Hafoin fase liman, Konselleiru Másimu partidu KHUNTO hakat ba kareta ne’ebé prepara no sae, depois Armanda Berta dos Santos tuir kedan.
Maibé antes sae kareta, Konselleiru Másimu Partido KHUNTO José dos Santos Naimori Bukar, hatan perguntas Jornalista kona-ba objetivu prinsipal ba PCIC hodi presta deklarasaun, Naimori hatan, prezensa ne’e atu kontribui ba prosesu judisial.
“Administrasaun partidu nian de’it”, José dos Santos Naimori Bukar, ko’alia ba Jornalista sira, no kontinua lao dadauk ba kareta privadu ne’ebé hein nia, Sesta-Feira (05042024), iha edifísiu PCIC Caicoli, Dili.
“Mai iha ne’e atu kontribui, depois ba Tribunal, ne’e ka….ne’e administrasaun, ne’e advogadu mak hatene”, Naimori ko’alia informasaun badak de’it ba jornalista sira.
Hafoin ida ne’e, Eis Vise Primeira-Ministra Armanda Berta dos Santos, hakat ba kareta ne’ebé para, maske jornalista sira husu perguntas, maibé nia la fó komentáriu ruma ba Mídia, no hakat ba kareta ne’ebé prepara.
Advagadu privadu Arnaldo da Costa Lopes hateten, ba jornalista sira katak, ne’e segredu justisa.
“Hanesan sidadaun, ita mai kolabora ho justisa, mai presta deklarasaun, mais entermus ba kazu sira ita seidauk hatene tanba na’in mak prokurador, pois mak imi (refere ba jornalista) hatene”, advogadu privadu ne’e esplika ba jornalista sira.
“Karik iha ona Ministériu Públiku, iha ona akuzasaun ruma, depois ita boot sira hatene, tanba ne’e segredu justisa”, nia kontinua tán.
Advogadu privadu Arnaldo da Costa Lopes esplika tán, rajaun la fó komentáriu ba mídia tanba advogadu akonpaña nia kliente atu fó asisténsia ba prosesu tomak.
Editór Testu: Amito Qonusere Araújo
loading="lazy" />