G-NEWS (DILI) – Kuarta-Feira (20122023), Xefe Governu Kay Rala Xanana Gusmão ho delegasaun to’o ona iha Timor Leste, hafoin hala’o vizita ba Japaun, hodi partisipa iha simeira Asosiasaun Nasoen Sudeste Aziatiku ba Dala-50, hahú hosi loron 16 to’o loron 18 fulan Dezembru, nu’udar observador ba membru ASEAN nian, ne’ebé konvida hosi Primeiru-Ministru Japaun Fumio Kishida.
Bainhira to’o iha Aeroportu, ho Aviaun Aero Dili, simu direita hosi Vise Primeiru-Ministru Interino Mariano Assanami Sabino, no membru Governu sira. To’o iha salaun Konferénsia Aeroportu Internasional Comoro, Xanana Gusmão informa kona-ba partisipa simeira iha Japaun.
“Ita ba hanesan observador, ita ba para akompanha, tanba hanesan observador, ita ko’alia oituan de’it mais atu ko’alia karik dehan, antes atu tama ASEAN buat ne’ebé imi ko’alia kona-ba ASEAN-Japaun ne’e, ami hetan tiha ona hosi Japaun”, Xefe Governu partilla informasaun ba membru Governu sira.
Kuandu to’o iha Aeroportu, Xefe Governu ne’e hateke hosi janela aviaun nian, hakfodak bainhira membru Governu sira mai simu nia.
“Ha’u hateke hosi Janela aviaun nia mai, ha’u haree imi hotu nakonu iha ne’ebá, Ha’u dehan, eihpahh, diabu sira ne’e invesde iha Parlamentu, mai fali halo saida iha ne’e”, Xanana ko’alia ho membru governu sira ho hamnasa.
Hafoin ida ne’e, Primeiru-Ministru mós husu ba membru governu sira kona-ba aprovasaun Orsamentu Jerál Estadu (OJE) 2024.
“Liu tiha ona ka”, Xanana husu.
Hatan ba ne’e, membru Governu hatan katak, liu tiha ona, no Xefe Governu hatan “Waohhhh”.
Ekipa sira mós informa ba Primeiru-Ministru Kay Rala Xanana Gusmão kona-ba rejultadu votasaun iha final global Proposta Orsamentu Jerál Estadu 2024, ho 41 votu a favor, 23 kontra no 0 abstensaun.
Jornalista : Ekipa G-News
Editór Testu : Amito Qonusere Araújo
loading="lazy" />