G-NEWS (DILI) – Sidadaun maiória kondena aktus hosi traballador loja Xineza ida nianiha Kampung-Baru ne’ebé ne’ebé públika imajen ho kategória vídeo hodi duun matak estudante ida hosi Institutu ICS katak nauk sasan iha loja laran.
Ho vídeo ne’ebé víral tebes iha sosiál mídia, ho durasaun la to’o minutu ida, ekipa traballador sira halo edisaun fali dehan estudante ICS nauk sasan iha loja laran.
Ho aktus ne’e, utentes sosiá mídia kondena aktus publikasaun vídeo ne’e tanba konsidera hamoe estudante hosi ICS nia privasidade, no família nia naran. Tanba ne’e, utilizador mídia halo krítika makaas no husu ba autoridade seguransa atu halo investigasaun klean, no husu atu loke CCTV iha loja laran, nu’udar evidénsia ida.
Relasiona ho ne’e, iha sexta feira (20102023) dáder, autoridade seguransa foti ona traballador sira hosi Loja Xina, inklui nia patraun, hodi halo investigasaun.
Juventude ida Benedito Ximenes informa ba G-News katak, ho aktus hosi traballador loja Xina ne’e, hamoe estudante hosi ICS, tanba ho publikasaun vídeo ne’ebé halo edisaun ho “Nauk Sasan” ba estudante ICS hanesan aktus imoral.
“Ita sente triste ho vídeo ne’ebé fó sai iha sosiál mídia. Timoroan ho Timoroan la defende malu, ba halo buat at ne’e. Sira la iha fuan liu, hanesan bin ida estudante ne’e ema rai-liur nia oan. La merese atu traballador sira halo hanesan ne’e”, tenik Benedito.
“Ohin Polísia mai kaer ona ne’e, hanesan ne’e par ita haree investigasaun ne’e lao. Se lae traballador sira ne’e halo oi-oin de’it. Di’ak liu check CCTV, kuandu la iha evidensia, di’ak liu taka tiha loja ne’e”.
Iha fatin hanesan, Leonela Armanda Gomes sente triste ho aktus hosi traballador sira hasoru estudante ICS ne’e, tanba aktus ne’e hatudu timoroan la iha solidariedade ba malu, no aktus ne’e hamoe feto Timor.
“Tanba ne’e, ita husu ba autoridade seguransa atu check CCTV iha loja laran, nune’e bele hatene ninia lia-loos. Kuandu la iha evidénsia, di’ak liu taka tiha loja ne’e. Tanba ne’e hahalok la di’ak, no estraga de’it ami feto sira nia dignidade”, Leonela haktuir.
Martinha Pinto, estudante UNTL sente triste ho aktus traballador sira nian, ne’ebé halo víral ema nia privasidade seim faktus iha sosiál mídia.
“Nu’udar feto Timor no estudante, sente triste ho aktus ne’e, tanba aktus ne’e hatudu katak timoroan rasik la iha ona unidade, la hadomi malu, maibé atu estraga malu de’it. Timoroan barak mak vítima ba utilizasaun sosiál mídia. Sira halo hanesan ne’e, kuandu ema kritika sira iha Facebook, no Polísia kaer sira, foin mak sira hakfodak”, Nia haktuir.
Alende ne’e, parte família hosi estudante ICS no sidadaun barak mak ataka hasoru patraun no traballador Loja Xina, iha ne’ebé loja ne’e mós taka.
To’o informasaun ne’e fó sai, G-News seidauk hetan komentáriu hosi estudante ICS, patraun Loja Xina ho nia traballador sira, inklui Autoridade seguransa.
Jornalista : Ekipa G-News
Editór Testu : Amito Qonusere Araújo
loading="lazy" />