Postu administrativu Matebian-Baucau foun seidauk iha edifísiu

208 Views

G-NEWS (BAUCAU) – Governu lokál utiliza provizóriu sede suku Laisorolai de Baixo ba servisu administrasaun postu administrativu Matebian foun, iha munisípiu Baucau, tuir Diploma Ministeerial númeru 85/2023 de 29 de Desembro.

Xefe Suku Laisorolai de Baixo Julio “Farkhus” Pinto, ba G-News, tersa-feira (09012024) katak, autoridade komunitáriu iha ona planu no polítika ba postu administrativu Matebian.

“Xefe Planu Establesementu ba postu administrativu foun mak oinsa bele lori atendimentu públika besik liu ba ita nia komunidade tanba komunidade iha área refere distánsia dook tebes hosi postu administrativa Quelicai, no bainhira komunidade halo ba iha postu administrativa Quelicai sempre hetan dezafiu hanesan hakur mota inklui komunidade balun mate iha dalan no hamlaha tuir-tuir, nune’e mós fasil asesu ba dezemvolvimentu hanesan projetu PDIM tanba postu administrativa Queliacai iha Suco 15”, Xefe Suku ne’e esplika.

Julio “Farkhus” Pinto esplika katak, polítika autoridade lokal mak sai aspirativu povu nian no peprezenta povu hodi hato’o komunidade nia preokupasaun ba Estadu no Governu hodi fo atendimentu públika ba ita nia komunidade tuir ezizensia tanba ami autoridade lokal hetan lejitimidade hosi komunidade no hetan legalidade hosi Estadu ne’ebé ami lian ba ita nia komunidade no pronto asegura postu foun ne’ebé dekreta ona hosi Prezidente Repúblika.

Nia dehan tán, maske postu ne’e estabelese ona, maibé to’o oras ne’e seidauk iha edifísiu funsionáriu sira.

“Problema ne’ebé mak ami enfrenta perante inisia no estabelesimentu ba postu administrativa foun maka agora dadaun ami nia postu públika ona iha jornal Repúblika maibé edifísiu permante maka seidauk iha, inklui rekursu umanu seidauk iha rekrutadu”, Julio subliña.

“Ho nune’e ami autoridade lokal hakarak fó hanoin ba Governu konstitusional da-sia atu nune’e iha tempu badak bele konstrui edifīsiu permanente no rekrutamentu ba ajente administrasaun no Administrador Posto Matebian nian hodi halo atendimentu públika ba ita nia komunidade sira iha postu administrativa foun ne’e tanba agora dadaun sede Suku Laisorolai de Baixo maka sai edifísiu temporaria ba postu foun tuir lei ne’ebé vígora ona”, nia hakotu.