G-NEWS (DILI) – Kliente Banku Nasionál ninia ATM (Automatic Teller Machine) ne’ebé estabelese iha kapitál Dili kuaze avaria hotu, no la funsiona ho di’ak bainhira kliente sira atu dada sira nia salariu mensal fulan Novembru nian.
Kliente ida Armando Ximenes ne’ebé G-News hasoru iha postu ATM Balide, sábadu (02122023) lamenta ho kondisaun ATM ne’ebé la funsiona di’ak ho responde nesesidade sidadaun sira nian.
“Orikalan ha’u mai check iha ATM parlamentu nian, maibé la funsiona di’ak. Tanba ha’u uza ATM-P24, pois ha’u ba fatin seluk mó la di’ak, ohin dáder ha’u ba tán fali mós la di’ak”, Armando haktuir.
Nia hateten tán, tuir loloos tékniku Banku Nasionál sira tenke halo ona manutensaun, nune’e la prezudika kliente sira nia nesesidade.
Iha parte seluk, Mariazinha Gomes Ferreira ba G-News lamenta ho situasaun hanesan, tanba ne’e nia husu ba tékniku Banku sira atu bele atende lalais preokupasaun ne’e.
“Situasaun ne’e halo ita triste oituan. Tuir loloos sira Banku ne’ebá tenke atende, labele hein ema krítika mak foin sira haree, entaun oinsa ho ita nia nesesidade, tanba agora atu ba fim-de-semana, susar tebes atu ba foti osan iha Banku”, Nia haktuir.
“Buat ida Banku ne’e halo ita stres de’it. ATM mós araska oituan, pois ita ba simu osan mós forma, koa tán osan. Tuir loloos sira tenke halo atendimentu di’ak, halo ita ulun moras de’it maun”, Mariazinha esplika.
Iha postu ATM Lecidere, Orlando Soares informa ba G-News ho triste tanba nia tama sai postu ATM ho modelu P-24 maibé iha nota informativu dehan la iha komunikasaun.
“Ohin dáder ha’u tama sai maibé la di’ak nafatin. Se ne’e mak la di’ak nafatin, ita hein to’o segunda, ita nia nesesidade labele atende, agora sábadu tán. Halo ita tensaun de’it”, Orlando espresa nia sentimentu triste ba G-News, sábadu (02122023).
Ho nune’e, kliente sira ne’ebé G-News entrevista, sira husu ba ba tékniku Banku BNCTL, Mandiri no BRI atu responde lalais ona postu ATM sira ne’ebé ávaria, nune’e bele atende nesesidade públiku.
Tuir observasaun G-News, kliente sira ne’ebé uza ATM tama sai maibé la funsiona.
Entertantu, to’o informasaun ne’e fó sai, G-News seidauk hetan resposta hosi Responsável sira hosi Banku tanba situasaun ne’e akontese iha loron sábadu fim-de-semana nian.
Jornalista : Ekipa G-News
Editór Testu : Amito Qonusere Araújo
loading="lazy" />