G—NEWS (DILI) — Prezidente Repúblika, José Ramos-Horta, simu Sua Eminénsia Dom Virgílio Kardeál do Carmo da Silva no membru sira hosi Konferénsia Episkopál Timorense (CET) iha Palásiu Prezidensiál, hodi diskute kona-ba repatriasaun restus mortais hosi figura relijioza importante na’in-tolu ne’ebé atualmente hakoi hela iha Portugál.
Inisiativa ne’e ho objetivu atu lori fila mai rai-laran restus mortais Monsenhor Martinho da Costa Lopes, nune’e mós Bispu dahuluk no daruak Timór nian, Dom Jaime Garcia Goulart no Dom José Joaquim Ribeiro.
Prezidente espresa ninia satisfasaun tomak ho proposta ne’e no promete apoiu hosi Prezidénsia Repúblika hodi hala’o inisiativa ida ne’e, subliña papel determinante hosi personalidade sira-ne’e ne’ebé desempenha papel fundamentál iha istória espirituál nasaun nian.
Durante enkontru, parte rua akordu atu define tinan 2026 nu’udar referénsia hodi hala’o transladasaun restus mortais sira-ne’e, ho objetivu atu finaliza prosesu ne’e antes fulan-outubru, hodi evita konstrajimentu ligadu ho tempu udan.
Prezidente Ramos-Horta kompromete mós atu fó apoiu tomak kona-ba koordenasaun ho autoridade sira iha Lisboa hodi fasilita negosiasaun diplomátika no lojístika ne’ebé nesesária.
Prezidente Repúblika no lideransa Kreda nian konkorda atu koabora hamutuk durante tinan oin mai, atu asegura lori fila-fali restu mortál Bispu sira-nian mai rai Timór.
Iha ontestu époka festiva ne’ebé besik ona, Kardeál do Carmo da Silva fahe mensajen ida ne’ebé sentra iha introspeksaun, pás no rekonsiliasaun.
Cardeal afirma fila-fali kompromisu Kreda nian atu reza ba lider nasaun nian no promove unidade no koezaun sosiál, hodi enfatiza katak tempu Natál tenke sai tempu atu hafoun domin no esperansa entre povu Timor.
Enkontru ne’e haktuir parseria metin no kooperativa entre Estadu no Kreda hodi promove estabilidade, armonia no morid di’ak ba povu Timor-Leste.
loading="lazy" />