G-NEWS (DILI) — Prezidente Repúblika José Ramos Horta hato’o parabeniza Prezidente Eleitu Estadus Unidus Amerika (EUA) Donald Trump, nu’udar prezidente ba dala-47.
José Ramos Horta, hato’o karta parabeniza ne’e, liuhosi ninia pájina ofisial Facebook José Ramos Horta, ne’ebé públika, iha loron kuarta-feira (06112024) kalan, hafoin ofisialmente anúnsiu rezultadu eleisaun Prezidente Amerika nian.
“Ba Prezidente eleitu Donald Trump, Ha’u kontente atu oferese ha’u nia parabéns manas liu ba ita-boot nia eleisaun nu’udar Prezidente Estadus Unidus nian ba dala 47”, lia-fuan PR Horta.
Iha karta ne’e, Xefe Estadu dehan, povu Estadus Unidus tau konfiansa ba Donald Trump ninia lideransa, atu hari’i parseria ba dame nian.
“Povu Estadus Unidus nian tau konfiansa boot iha ita-boot nia lideransa. Tempu dezafiante no perigozu sira-ne’e husu lideransa ne’ebé bele taka divizaun sira no harii parseria sira ba dame. Sua Majestade bele tama iha istória nu’udar ema ne’ebé halo dame globál, ne’ebé presiza tebes iha mundu ohin loron nian”, haktuir José Ramos Horta
José Ramos Horta iha konfiansa ba Donald Trump nia lideransa hodi hadi’a fali relasaun entre Rúsia no Repúblika Popular Xina nian ba dame, inklui nasaun seluk ne’ebé durante ne’e enfrenta konflitu sira.
“Ha’u iha konfiansa katak ita-boot nia lideransa sei hadi’a fali relasaun sira ho Rúsia no Repúblika Populár Xina nian ba dame no parseria ne’ebé dura. Nune’e mós, mundu hein ba ita-boot nia lideransa hodi lori dame no estabilidade ba tempu naruk ba Líbanu, Ukránia no Gaza, no sentidu ida hosi rai-inan Palestina nian ne’ebé moris hamutuk ho Israel ne’ebé seguru”, Xefe Estadu haktuir.
Tuir manan-na’in ba Prémiu Novel Dame nian José Ramos Horta katak, ho jeografikamente haketak rai rua ne’e, maibé Timor-Leste no Estadus Unidus Amérika fahe valór báziku sira demokrasia, estadu direitu no respeitu ba dignidade umana.
“Ha’u fiar katak iha ita-boot nia administrasaun ita sei hametin liután ita-nia relasaun no kooperasaun bilaterál. Ha’u dezeja ba Ita-boot nia Majestade no ba Ita-boot nia família ksolok no susesu barak iha Ita-boot nia esforsu hotu-hotu”.
Entertantu, Donald Trump hetan pelumenus votu eleitorál 270 hosi 270 ne’ebé presiza atu atinji maioria ho vitória iha estadu xave sira Pennsylvania nian, Georgia no Carolina Norte.
Eis-Prezidente norte-amerikanu, Donald Trump, halakon vise-prezidente Kamala Harris hodi manán mandatu foun ida durante tinan haat nu’udar líder hosi superpoténsia.
Trump, tuir planu sei nomeadu hanesan Prezidente ba mandatu foun ida iha loron 20 fulan-Janeiru tinan 2025.
Editór Testu: Amito Qonusere Araújo
loading="lazy" />