G—NEWS (INTERNASIONAL) — Prezidente Prabowo Subianto no Prezidente Brazil, Luiz Inácio Lula da Silva, hala’o enkontru bilaterál iha Istana Merdeka, iha Jakarta. Iha sorumutu ne’e, Prabowo deside atu introduz ensinu lian Portugés iha eskola Indonézia nian.
Prabowo fó sai anúnsiu ne’e durante enkontru bilaterál no almosu iha Istana Merdeka, iha Jakarta, Kinta-feira (23 Outubru 2025). Prabowo subliña katak Brazíl hanesan parseiru importante ida hosi Indonézia.
“Ha’u iha konfiansa katak iha futuru ami sei hetan rezultadu ne’ebé maka’as liu. Hanesan prova katak ami haree Brazil hanesan importante tebes, ha’u desidi ona katak portugés sei sai hanesan lian ida ne’ebé maka iha prioridade iha dixiplina edukativu indonéziu sira”, Prabowo hatete.
Prabowo afirma katak nia sei orienta Ministru Ensinu Superiór no Siénsia no Teknolojia, Brian Yuliarto, no Ministru Ensinu Báziku no Sekundáriu, Abdul Mu’ti, atu halo tuir desizaun ne’e. Nia hein katak movimentu ne’e sei implementa kedas iha eskola sira.
“No ha’u sei fó instrusaun ba ministru Ensinu Superiór no Ensinu Báziku indonéziu nian hodi hahú hanorin portugés iha ami nia eskola sira. Ne’e hanesan prova katak ami haree relasaun forte entre Brazil ho Indonézia”, Prabowo hatete.
Iha nia enkontru ho Prabowo, Prezidente Lula hato’o nia esperansa katak Brazil no Indonézia bele estabelese kooperasaun ne’ebé fó benefísiu ba malu, partikularmente iha setór ekonómiku no sientífiku.
“Ha’u hein katak durante vizita ne’e ba Indonézia no durante ami nia enkontru, ami bele garante benefísiu polítiku, ekonómiku, sosiál, no sientífiku ba povu Indonézia no Brazil”, Lula hatete.
loading="lazy" />