G-NEWS (BOBONARO) – Prezidénsia Repúblika, liu husi assesoria assuntu Inkluzaun Sosiál ne’ebé lidera hosi assessór Prinsipál, Gaspar Afonso kontinua distribui apoiu sosiál hanesan fós, mina ba tein, kulsaun, pasta no kadernu ba estudante inklui parsél hahan, ba ema ho defisiénsia iha postu-administrativu Bobonaro no postu-administrativu Lolotoe, iha munisípiu Bobonaro.
‘’Ita distribui iha Munisípiu Bobonaro, iha Suku Teba-bui no Postu-Administrativu Lolotoe, mai apoiu ita nia maluk difisiénsia sira. Ida ne’e, halo sira sente dehan diskriminadu, ita lalori buat barak maibé ho vizita ne’e de’it mos sira sente orgullu tambá estadu ida ne’e la husik sira mesak’’ Dehan Assesór Afonso, hafoin distribui apoiu sosiál iha Lolotoe, Tersa ne’e.
Iha komunikadu ne’ebé G-News asesu, assesór ne’e informa, bainhira nunka vizita sira (Ema ho difisiénsia iha area rurál), no la lori domin ba sira, ne’e sira sente diskriminadu iha sira nia moris no sente izoladu, tanba barak ne’ebé mai hosi família moris vulnerável tebes.
Hanesan ema ne’ebé mak reprezenta ema ho defisiénsia iha Palásiu Preidensiál, Gaspar Afonso haktuir, apoiu sosiál sira ne’ebé durante distribui, mai hosi inisiativa Prezidente Repúblika José Ramos-Horta ho objetivu atu lakohi husik ema ida iha kotuk, no fó domin ba sira mesmu apoiu ne’e atende de’it iha loron ida ka rua maibé importante mak prezensa iha sira nia le’et.
“Hosi atividade sosiál ne’e, atu fanun hikas ema hotu liu-liu governante sira atu hare situasaun ema ho defisiénsia iha territóriu nasionál, no Xefe Estadu atuál mos fó prioriedade ba assuntu ema ho defisiénsia no direitu humanu, atu promove fraterninade umana”, tenik Afonso.
Nia mos husu ba Ministériu relevante ba assuntu ema ho defisiénsia liga ho dekretu Lei Nú. 8/2024 ne’ebé governu da-IX revoga, atu fó mós prioriedade ba ema ho defisiénsia husi idade 0-17 atu assesu mós ba pensaun seguransa sosiál.
Calisto Ximenes, reprezenta nu’udár mos matadalan ba rekolla dadus ema ho defisiénsia nian iha área rurál expressa ‘’Ha’u reprezenta maluk ema ho difisiénsia hato’o ami nia agradesimentu ba Prezidénsia Repúblika ne’ebé ajuda ona alin difisiénsia sira ne’ebé durante ne’e la hetan apoia sosiál ruma’’.
Entretantu, distribuisaun apoia sosiál ba ema defisiénsia iha Munisípiu Bobonaro, ho totál benefisiáriu na’in-15 kompostu hosi na’in 5 mai hosi Suku Bugas, iha postu-administrativu Bobonaro, no na’in 10 mai hosi Suku Deudet, postu-administrativu Lolotoe.
Ema ho defisiénsia ne’ebé hetan benefisiária, maiória ema ho defisiénsia iha liman, ain, matan no mentál ho tinan menus hosi 17 hamutuk na’in 12 no tinan 30-resin hamutuk na’in-3.
Editór Testu: Amito Qonusere Araújo
loading="lazy" />