Prezidente TATOLI.IP seidauk simu informasaun, Lei Komsos hatodan protokolu PA-RAEOA

G-NEWS (DILI) – Prezidente Ajênsia Nasionál TATOLI.IP Manuel Pinto, seidauk simu informasaun ofisial kona-ba kazu Protokolu Prezidente Autoridade RAEOA rasta monu, no tent atu tuku jornalista destakadu Ajênsia TATOLI.IP iha Oecusse.

Manuel Pinto hato’o lia ne’e ba G-NEWS, kuarta-feira (05062024) liuhosi kontaktu telefone.

Manuel Pinto ko’alia lia-badak ba perguntas ne’ebé redasaun G-NEWS manda ba nia katak to’o oras ne’e nia seidauk simu informasaun hosi jornalista destakadu TATOLI IP nian iha Oecusse.

“Seidauk simu informasaun oficial”,Prezidente TATOLI.IP ko’alia ba G-NEWS.

Lideransa Mídia Estatal TATOLI.IP sei diskute kona-ba kazu ne’e, bainhira nia parte simu ona relatóriu hosi kronolójia akontesimentu.

“Sei diskuse bainhira hetan ona relatório kronologia hosi jornalista Tatoli”, Manuel Pinto.

Bainhira G-NEWS husu kona-ba kazu ida ne’e, ameasa ba liberdade imprensa iha Timor Leste ka lae, Prezidente Ajênsia Notisiozu TATOLI.IP Manuel Pinto dehan, depende ba kronolójia hosi problema ne’ebé akontese.

“Depende ba kronolójia problema mak ita haree”,Manuel Pinto hakotu.

Tuir Lei Komunikasaun Sosiál, artigu 41 kona-ba atentadu ba liberdade informasaun;
1. Sei hetan pena-prizaun to’o tinan-rua ka multa ba ida ne’ebé mak;
a. Impede ka perturba kompozisaun, impresaun, distribuisaun no sirkulasaun livre hodi halo publikasaun
b. Tahan publikasaun sasá de’it
c. Tahan ka hahaat matérial sasá de’it ne’ebé presiza hodi hala’o atividade jornalístik
d. Impede asesu livre Jornalista nian iha fatin públiku ka ekipa órgaun imprensa nian
e. Hala’o aktu seluk sasá de’it ne’ebé perturba, impede hamosu ka hamenus kapasidade hodi hala’o atividade jornalístika nian haktuir lei ida-ne’e.

1. Funsionáriu públiku ka ajente Estadu, ne’ebé komete atentadu ba liberdade imprensa sei hetan kastigu ho pena-prizaun to’o tinan tolu ka multa.
2. Tentativa nu’udar punivél
3. Responsábidade kriminál infrator nian, la hahaat direitu hodi fó indeminizasaun tuir saida mak hatuur iha rejime jerál responsabidade sivíl nian.

Entertantu, Protokolu Prezidente Autoridade RAEOA Aquito Roxaca Guterres rasta monu Jornalista destakadu Ajênsia Notisiozu TATOLI.IP Abilio Elo Nini, bainhira hala’o kobertura ba serimónia RAEOA ho TIMOR AID ne’ebé selebra akordu ba estabelesimentu muzeum Pais-Timor iha Oecusse.

Aleinde ne’e, protokolu ne’e mós tenta atu tuku tán Jornalista destakadu TATOLI.IP iha RAEOA bainhira Jornalista Abilio Elo Nini husu protokolu ne’e kona-ba rajaun rasta monu iha públiku nia oin.

Kazu ne’e akontese iha tuku-5 lorokraik óras Timor Leste, iha área ótel Ambeno Oecusse nian, tersa-feira (04062024) orseik.

Editór Testu : Amito Qonusere Araújo