G-NEWS (DILI) – Faan na’in roupa “Obralan” iha Merkadu Manleuana no Aimutin, menus hetan rendimentu tanba sosa na’in ladun sora.
Tuir fontes ida ne’ebé lakohi fó sai nia identidade, hala’o atividade negósiu, faan roupa iha Merkadu Manleuana informa ba G-News, Sábadu (25112023) katak, durante ne’e sosa na’in sira menus sosa roupa “obralan”. Antes ne’e, loron ida dalaruma hetan osan dollar atus ida ba leten, maibé ikus-ikus ne’e menus hosi dollar atus ida.
Nia dehan, durante ne’e rendimentu menus tanba númeru faan roupa “obralan” kontinua aumenta.
“Maun, roupa hirak ne’e ema ladun sosa, tanba ema barak mak faan. Balun faan iha bairo laran, entaun ba ema ba sosa ida besik duke to’o mai iha Manleu ka fatin dook oi’tuan”.
Faan na’in ida iha Parte Aimutin dehan, sosa na’in sira menus sosa roupa “Obralan” iha Aimutin la hanesan fulan neen ka hitu liu-ba.
“Ema menus, tanba ema hotu-hotu sosa no faam de’it iha bairro laran, pois lona Xina mós faan roupa iha bairro laran, entaun ita nia maluk sira hakarak sosa ida besik ne’e, duke lao to’o mai Aimutin”, fontes G-Nsws ne’e esplika.
“Kona-ba rendimentu, menus oi’tuan ona, maibé ami hanesan moris ho faan roupa ne”e, ami faan nafatin, heran oi’tuan-oi’tuan mós la buat ida. Ita labele obriga ema, importante mak ita faan, moris ho vida negósiu, tenke jujur, disiplina, ema mai sosa, respeita sira, ida ne’e mak importante”, fontes ne’e informa.
Tuir observasaun G-News iha Merkadu Manleuana no Aimutin, ema barak sei kontinua sosa roupa “Obralan” tuir nesesidade.
Jornalista : Ekipa G-News
Editór Testu : Amito Qonusere Araújo
loading="lazy" />