G-NEWS (DILI) – Durante férias naruk desde loron eleisaun suku (Elsu) to’o loron finadu, transporte públiku hanesan Taxi sira ne’ebé hala’o movimentu iha kapitál Dili, ladun hetan rendimentu di’ak tanba sidadaun barak hala’o viajen ba munisípiu tuir eleisaun suku, no prepara atu selebra loron santo no loron finadu.
Taxista Fernando Gomes, inform aba G-News iha Fatuhada, kinta-feira (02112023) hateten, durante loron eleisaun to’o agora, nia parte ladun hetan rendimentu di’ak hosi movimentasaun taxi tanba passajeiru sira menus, la hanesan ho loron bain-bain.
“Desde eleisaun suku to’o agora ne’e, rendimentu menus tebes, la hanesan ho loron bain-bain, tanba ema feriadu hotu ba foho, ba tuir eleisaun suku, no loron matebian nian. Bain-bain ne’e dalaruma ha’u hetan 30 dollar maibé iha ferias naruk ne’e la to’o ida, atu enxe ba mina de’it mós dalaruma la to’o”, hateten Fernando ba G-News.
Nia hateten tán, ho folin mina ne’ebé sae, fó impaktu mós ba presu transporte sira hanesan Taxi sira ne’ebé buka passajeiru. Nia fó ezemplu, pasajeiru ida sae taxi husi diresaun Fatuhada ba Audian, selu ho dollar 4 ho balun.
“Agora ne’e folin mina sae maun, ne’ebé ba Audian ne’e dalaruma dollar 3, ka dollar 4. Kuandu ami halai loron tomak, enxe de’it mina nian mós susar oi’tuan, maibé ita tenke pasiensia tanba ne’e mak nia moris loron-loron. Ami nia servisu mak nune’e ona, atu iha ka la iha, ami esforsu oinsa par hetan osan rahun oi’tuan par bele sustenta nesesidade família nian”, Fernando esplika kona-ba ne’e.
Taxista seluk, Bernardino Meneses, inform aba G-News, iha estrada públiku diresaun Merkadu Comoro ba Tasitolu informa, durante férias naruk, rendimentu menus tebes kompara ho loron bain-bain, tanba sidadaun barak fila ba foho hodi tuir eleisaun suku no selebra loron finadu.
“Ami nia passajeiru sira mak estudante, ema sira servisu iha kantor sira, sira fila hotu ona ba tuir eleisaun suku, no loron finadu, ne’e mak ami nia pendapatan menus, la hanesan loron bain-bain”, Bernardino konta kona-ba ne’e.
“Bain-bain ne’e, loron ida dalaruma ami hetan 30 dollar ka 40, maibé ne’e mina ami enxe nakonu ona, maibé férias ne’e, pendapatan menus, loron hirak ne’e ha’u hetan de’it 20 dollar, maibé mina mós enxe la nakonu hanesan bain-bain. Hosi Merkadu Comoro ba Tasitolu selu ho 3 dollar 50 sent”, nia haktuir
Iha parte seluk, passajeiru Jõao Sequeira ne’ebé é G-News dadalia iha Pantai-Kelapa, hafoin tun hosi taxi dehan, nia selu taxi ho dollar 5 hosi diresaun Culuhun mai Pantai-Kelapa. Nia sente triste ho folin taxi ne’ebé sae. Nia konsidera taxista sira manipula presu normal ne’ebé iha, tanba tuir nia hatene katak, tuir loloos hosi fatin ne’ebé nia mai selu ho dollar 2 ka másimu dollar 3.
“Ha’u selu kedan dollar-5, ne’e ha’u haree hanesan manipulasaun hosi taxista sira. Maibé ita pasiensia de’it ona tanba transporte la iha atu mai, no ita nia nesesidade orjente entaun ita sae mai de’it ona, maibé ha’u hanoin kuandu férias ne’e remata, ha’u hanoin ida ne’e la akontese ona, tenke fila-fali ba presu normál”, nia lamenta kona-ba ne’e.
Jornalista : Ekipa G-News
Editór Testu : Amito Qonusere Araújo
loading="lazy" />