G-NEWS (DILI) – Sekretáriu Estadu Formasaun Profesional no Empregu (SEFOPE) husu traballador Timoroan iha Australia atu labele sai hosi Sistema servisu iha kompaña.
Lia-hirak ne’e, Diretór-Jerál SEFOPE hato’o hafoin partisipa iha serimónia despedida traballador hamutuk na’in-82, iha Suai Room Timor Plaza, Segunda-Feira (13/05).
Aleinde halo despedida, governu mós assina deklarasaun ho família traballador na’in-82 kompostu hosi Re Entry na’in-51, no foun na’in-31 atu ba servisu iha Australia.
Diretór-Jerál SEFOPE Carlito do Rosário Cabrál enkoraza traballador re-entry sira atu labele influensa traballador foun hodi viola regra, maibé hanorin atitude di’ak nune’e bele iha oportunidade seluk ba traballador ne’ebé iha hela prosesu laran.
“Lia-menon ba traballador re entri sira, ita boot sira labele influensia sira foun hodi viola regra atu sai hosi Sistema, tanba ita boot sira mak esperiênsia ona ne’ebé hatene buat barak”, afirma Diretór-Jerál SEFOPE.
Diretór ne’e parabeniza traballador sira ne’ebé hatudu atitude diak, bele hetan oportunidade to’o dala hitu, tanba ne’e hatudu nafatin komportamentu di’ak, nune’e labele taka dalan ba timoroan seluk ne’ebé tuir hela prosesu rekrutamentu nee.
Carlito mós husu ba familia sira atu enkoraza oan sira, liuhosi orasaun nune’e bele iha servisu ho vontade
“Lia-menon mos ba inan aman sira, favor ida enkoraza sira liuhosi orasaun, atu nune’e fó forsa no matak malirin ba sira, hodi nune’e isin di’ak nafatin to’o tempu ne’ebé sira fila mai ho kondisaun ne’ebé saudável”.
Tuir dadus ne’ebé G-News asesu, traballador na’in- 82 ne’e, kompostu mane hamutuk na’in-70, no feto hamutuk na’in12.
Tuir estatistíka, desde fulan Janeiru to’o fulan-Maiu tinan 2024, traballador timoroan iha Australia hamutuk na’in-1021.
Traballador hirak ne’e sei hala’o servisu iha área Agrikultura no Industria, ne’ebé sei aranka iha tempu besik.
Jornalista : Martinho Belo
Editór Testu : Amito Qonusere Araújo
loading="lazy" />