G-NEWS (MANUFAHI) – Foinsa’e sira iha munisipiu Manufahi, lamenta sertidaun RDTL pendenti hela iha eskritóriu servisu delagasaun rejistu sivíl no Notariadu munisipiu, no ladauk hetan asinatura husi diretúr servisu munisipal, tanba dadaun ne’e moras baixa hela iha ospital Nasionál Guido Valadares Dili.
Foinsa’e inisial JST ne’ebé lakohi públika nia identidade ba G-News tersa-feira (13/06) ohin informa, joven lubun ida sai ona vitima atu trata dokumentu asésu ba servisu, kontinua estudu, tanba servisu dirasaun rejistu sivíl Notariadu munisipiu Manufahi, pendenti hela durante fulan 3 resin, to’o agora seidauk asina husi diretúr delegasaun servisu munisipal rejistu sivíl no Notariadu.
Foinsa’e ne’e lamenta tebes ho prosésu atendementu ne’e, tanba joven lubuk ida nia dokumentu funsionáriu sira print tiha ona, agora dadaun butuk hela iha diretúr nia meza leten, maibé labele foti tanba seidauk asina.
“Tanba ne’e ami ezizi ba ministériu relavante presisa buka rezolve, hatún despaisu ruma hodi garantia prosésu atendementu ba sidadaun sira, nune’e la defikulta ami joven sira niq futuru.
Ho situasaun ne’e, halo ami joven sira sai ona vítima atu trata dokumentu ba eskola, ba servisu no seluk tan, ami labele trata tanba ami nia dokumentu sertidaun RDTL pendenti hela iha Munisípiu Manufahi, “nia hatutan”.
Ba G-News, Xefe departamentu servisu delegasaun rejistu sivíl munisipiu Manufahi, Margarida da Costa relata katak, loos duni dokumentu barak inklui sertidaun RDTL agora ne’e pendenti hela tanba diretúr moras no agora baixa hela iha ospital Nasionál Guido Valadares Dili hein atu opera, tanba ne’e prejudika dokumentu barak maka ladauk asina.
Xefe departamentu informa ona problema ne’e ba ba diretúr jeral atu buka solusaun, maibé to’o agora ami seidauk hetan informasaun.
Jornalista : Júlio Guterres Bosi-Cai
Editór Testu : Amito Qonusere Araújo
loading="lazy" />