G-NEWS (DILI) – IX Governu konstitusional lideradu, Primeiru Ministru Kay Rala Xanana Gusmão afirma, iha ninia mandatu sei kumpre sistema ne’ebé iha katak, Orsamentu Jerál Estadu bainhira lori ba Parlamentu Nasionál sempre bazeia ba programa no planu hodi atinji meta.
Xanana hato’o lia hirak ne’e, hafoin hala’o enkontru ofisial ho Xefe Estadu José Ramos Horta, hodi informa polítika IX Governu konstitusional ninian, hafoin programa ba tinan lima pasa ho unanimidade iha Parlamentu Nasionál, Kuarta-feira, loron 19 fulan Jullu tinan 2023.
“Ita ninia sistema temi dehan orsamentu bazeia ba programa, se orsamentu bazeia ba programa maka ita iha programa asaun tinan 5,” Xanana hato’o ba mídia sira, iha Pálasiu Prezidensial Bairro-Pite-Dili, Kinta-Feira, 20 Jullu 2023.
Xefe Governu ne’e afirma tan, durante mandatu, sei hahú ho atividade to’o hetan rejultadu, tuir programa ne’ebé prepara tiha ona.
“Bainhira governu iha orsamentu $100.000, tinan primeiru 2024 tau de’it 10 mill, 2025 tau 30 mill, 2026 tau 40 mill, no ikus 2027 osan restu ne’ebé iha tau hodi halo hotu projetu ne’ebé iha”, Xanana fo ezemplu.
“Atu ita bo’ot (jornalista) sira bele kompriende di’ak liutan katak ho alokasaun refere maka hanaran orsamentu bazeadu programa”, Xefe Governu ne’e haktuir tán.
Membru governu sira sei haree hotu programa ne’ebé hetan ona aprovasaun, liu-liu planu anual asaun tinan 2024 atu preve orsamentu hodi ezekuta tuir programa nune’e evita gasta arbiru.
Alende ne’e, governu mós sei hakas án liutan hodi haree lalais orsamentu, nune’e bele finansia atividade to’o fulan dezembru tinan ne’e.
Xanana mós Agradese ba Xefe Estadu tanba fo konfiansa ba governu, no kompromete, kada semana sei marka prezensa hodi informa atividade ne’ebé hala’o tiha ona.
“Programa aprovadu ona maka kna’ar governu nian legál ona, mas legal de’it seida’uk to’o, agora maka servisu komesa hahú, maibé iha semana ne’e hanesan ohin informa ba xefe estadu katak, sei okupadu tanba sei haree lei orgánika, aprova tiha hodi bele define se mak haree no halo saida, depois ida ne’e hotu sei prepara hakat ba reuniaun hodi diskute orsamentu retifikativu,” Xanana hakotu.
Jornalista : Ekipa G-News
Editór Testu : Amito Qonusere Araújo
loading="lazy" />