G—NEWS (JOGJAKARTA) — Primeiru-Ministru Timor-Leste Xanana Gusmao hasoru malu ho Sri Sultan Hamengku Buwono X hodi ko’alia kona-ba estabilidade rejionál ASEAN nian hafoin nia nasaun sai adezaun ofisiál ba organizasaun ne’e iha Segunda (8 Dezembru 2025).
Enkontru ne’e akontese lakleur de’it hafoin ninia nasaun simu ofisialmente nu’udar membru ASEAN iha Simeira ASEAN ba dala 47 iha Kuala Lumpur iha fulan Outubru nia rohan.
Tuir informasaun ne’ebé G—NEWS asesu iha online news Jogjakarta diária segunda-feira (08122025), katak, Xanana haktuir katak ninia vizita ba Jogjakarta nu’udar ninia esperiénsia dahuluk no mós oportunidade ida atu hetan komprensaun kle’an liután kona-ba istória Indonézia nian.
“Vizita ida ne’e hanesan onra ida ba ha’u, tanba ida ne’e hanesan primeira vez ha’u mai iha Jogjakarta, no ha’u foin hatene kona-ba Jogjakarta nia istória hafoin hasoru malu ho Sua Majestade. Buat ne’ebé halo ha’u hakarak mai iha ne’e maka Borobudur, tanba besik Jogjakarta,” dehan Xanana ne’ebé akompaña husi Sri Sultan, iha Segunda (8 Dezembru 2025).
Xanana hatutan tan katak enkontru ne’e la’ós ajenda formal kooperasaun nian. Tuir nia, forum ida ne’e hanesan forum ida atu kompriende kontextu kultural no istoriku Indonesia nian, ne’ebe atrai ona estudante timoroan barak mai estuda iha Jogjakarta.
“Ida-ne’e hanesan enkontru de’it. Kooperasaun ne’e iha kleur ona tanba timoroan rihun ba rihun maka estuda iha ne’e, tanba ne’e la’ós enkontru serbisu nian. Ohin ha’u hasoru Sua Majestade Sultan no aprende uitoan kona-ba istória”, nia hatete.
Hanesan membru foun ASEAN nian, Xanana subliña importánsia hosi diálogu hodi mantein estabilidade rejionál, inklui hodi hatán ba relasaun sira ne’ebé aumenta entre Kamboja ho Tailándia.
“Hanesan membru foun sira ASEAN nian, ami husu nafatin atu nasaun ida-idak halo diálogu, tanba lahó diálogu, parte ida-idak sei defende de’it nia opiniaun rasik. ASEAN tenki hatudu ezemplu hodi defende dame no rejeita konflitu”, nia hatete.
Entretantu, Sri Sultan apresia ho Xanana nia prezensa no hato’o bemvindu ba relasaun ne’ebé kleur ona entre Jogjakarta ho povu Timor Leste liu-liu iha área edukasaun.
“Ha’u hato’o ha’u nia agradesimentu ba nia prezensa. Ami halo hela diálogu ida hodi entende malu, tantu iha termu istória nian no buat sira seluk ne’ebé merese respeitu mútuo”, nia hatete.
Sri Sultan hato’o nia esperansa katak relasaun entre Jogjakarta ho Timor Leste metin nafatin, liu-liu tanba estudante barak husi nasaun ne’ebá mak eskola iha Jogjakarta.
“Espera katak, futuru estudante Timor Leste ne’ebé estuda iha Jogjakarta sei sai di’ak liután, no relasaun ne’e metin nafatin,” nia akresenta.
Enkontru ne’e afirma kompromisu husi parte rua atu hametin lasu edukasionál no kulturál, no mós kooperasaun rejionál ne’ebé foka ba estabilidade ASEAN nian.
loading="lazy" />