G-NEWS (DILI) — Xefe Governu Kay Rala Xanana Gusmão, kinta-feira (18072024) hasoru malu ho Xefe Estadu José Ramos Horta, hodi ko’alia ba malu kona-ba viajen Xefe Estadu durante ne’e.
Hafoin enkontru parte rua, Xanana Gusmão, ko’alia ba jornalista sira katak, Xefe Estadu nia viajen ba nasaun sira, tanba iha dever hodi lori Timor Leste ba mundu, ho objetivu atu fó hatene ba mundu kona-ba progresu Timor nian.
“Ha’u fó parabens ba Prezidente tanba nia ba Ângola, Mozambike, buat hotu lao di’ak, kapás ona ba, no agora Prezidente atu ba fali Xina”.
“Ne’e duni, nu’udar Prezidente Repúblika, iha dever hodi lori nafatin ita nia rain, ba iha mundu, ba ho objetivu katak, fó hatene ba mundu tomak, ita lao oinusá”, PM Xanana Gusmão, ko’alia ba jornalista sira.
Xanana Gusmão afirma tán, ho Xefe Estadu nia prezensa iha mundu, atu hametin di’ak liu-tán relasaun, no informa ho onestu kona-ba situasaun ne’ebé Timor enfrenta dadauk.
“Bain-bain kuandu to’o iha fatin ida, ita la dehan katak buat hotu lao di’ak, ita tenke-ser onestu, lao hanesan ne’e, buat hotu atrazu, mais ami lao nafatin, ne’e duni, ida ne’e hanesan komprimentu hosi governu ba Prezidente, no desezu mós, agora ba Xina, Vietname, buat hotu bele di’ak nafatin hodi hametin liu-tán relasaun sira”, PM ko’alia ba jornalista sira.
Editór Testu : Amito Qonusere Araújo
loading="lazy" />