G-NEWS (SUAI/DILI) — Auto estrada diresaun postu Zumalai ba kapitál Suai munisípiu Covalima hatauk movimentu transporte públiku ka privadu iha tempu kalan, bainhira hala’o movimentu.
Movimentu hatauk transporte sira tanba rai monu taka estrada, no estrada ne’e rasik área balun kuak to’o 4 ka 5.
Sidadaun ida Marcos Barreto, ko’alia ba G-NEWS, segunda-feira (30092024) iha kapitál Suai Villa katak, ho problema ne’e difikulta tebes ba movimentu transporte privadu no públiku sira, liu-liu mós motorizada ne’ebé la’o iha tempu kalan.
“Auto estrada Zumalai ba Suai ne’e at kleur ona, rai monu taka tiha, maibé to’o oras ne’e seidauk iha intervensaun hosi Governu, tanba ita sira ho motor iha tempu kalan, liu-liu ba maluk sira hosi munisípiu seluk mak liuhosi auto estrada, ita nia tauk, mak nia hanoin estrada di’ak, derepende ba iha estrada kuak ne’e, nia monu, ita rasik mak vítima”, Marcos Barreto.
Ho kondisaun auto estrada ne’e, nia parte husu ba governu atu aselera lalais, nune’e bele asegura di’ak ba movimentu transporte roda hat, liu-liu motorizada sira ne’ebé movimentu iha tempu kalan.
Iha parte seluk, Florindo Barreto, hosi postu Zumalai, ko’alia ba G-NEWS, kinta-feira (03102024) iha nia hela fatin Formoza, Dili haktuir, iha semana rua liu ba, nia parte hala’o viazen hosi Dili ba Suai, hakfodak ho kondisaun auto estrada, tanba nia hanoin katak, rai monu ne’ebé taka estrada hadia ona.
“Ha’u hanoin kuak no rai monu ne’ebé taka estrada hadia ona, maibé to’o oras ne’e seidauk hadia”, Florindo Barreto.
“Ita husu ba Autoridade munisipiu Dili atu bele halo intervensaun imediata, tanba ita la’o tempu kalan, kuandu ita la atensaun, ita susar boot. Ita tauk liu mak maluk sira hosi munisípiu seluk ne’ebé ba vizita família ka kolega ruma iha Suai, liu-liu hala’o viazen iha tempu kalan, bele hetan asidente iha dalan”, Florindo Barreto kontinua husu kona-ba ida ne’e.
Tuir observasaun G-NEWS, auto estrada parte liman karuk diresaun hosi Zumalai ba Suai kuak no monu, enkuantu diresaun Suai villa, rai monu taka estrada, maibé to’o oras ne’e seidauk hetan intervensaun.
Maske kondisaun nune’e, maibé movimentu transporte públiku no privadu, inklui motorizada sira mós la’o normal.
Tuir nota informativu ne’ebé fó sai hosi Ajensia Notisiozu TATOLI.IP, iha loron 15 fulan-Janeiru tinan 2020 katak, Ministru Obras Públika halo ona kontratu suplementár ho kompañia konsórsiu Xina Overseas Engineering Group Co. Ltd no Xina Railway First Group Co. Ltd, hodi hahú reabilita auto estrada ne’ebé kotu iha Fatukai to’o ponte Mola iha Suai, Covalima.
“Rai monu hodi estraga auto estrada ne’ebé tama responsabilidade Governu nian, ami hala’o ona kontratu sumplementáriu ho kompañia no sira halo hela retensaun”, Diretór-Jerál MOP, Rui Hernani F. Guterres, iha edifísiu Diresaun Nasionál Peskiza ba TATOLI iha laboratóriu, Caicoli, tersa-feira.
Antes ne’e, Ministru Obras Públika Salvador Eugenio Soares dos Reis Pires hateten, auto estrada ne’ebé kotu iha Fatukai to’o ponte Mola iha Suai, Governu mak sei toma responsabilidade hodi halo retensaun ho kustu orsamentu miliaun $ 1-resin tanba auto estrada ne’e kotu impaktu hosi dezastre natural.
Entertantu, estrada Suai inagura iha loron 17 fulan-Novembru tinan 2018, hosi Ministru Obras Públika Salvador Eugenio Soares dos Reis Pires, ho Ministru Prezidénsia Konsellu Ministru (MEPKM), Agio Pereira hosi Fatukai-Zumalai ho kilómetru 30.3 ho total orsamentu hamutuk miliaun $ 304 dollares amerikanu.
loading="lazy" />