G—NEWS (LOSPALOS) — Prezidente Autoridade Munisipál Lautém ho funsionáriu iha Administrasaun antuziasmu tebes, simu Boxista Lautém oan, Fabiano Correira ne’ebé vizita Administrasaun Autoridade Munisipál Lautém, hafoin tuir kompetisaun iha Jakarta Indoneia, iha loron 30 fulan-Maiu tinan 2025, manán ho BWS Championship vol. 2, kategoria 52 Kg.
Fabiano hetan tara tais direta husi Prezidente Autoridade Munisipál Lautém Mélio de Jesus.
Prezidente Autoridade Munisipál Lautém Mélio de Jesus, lori Povu Munisípiu Lautém nia naran parabeniza no agradese ba Boxista Fabiano Correira ne’ebé lori Estadu RDTL no Lautém nia naran, hodi hamorin iha nível Internasionál, tanba bele hatudu prestasaun iha área Boxista nian iha Jakarta Indonezia.
Nune’e, Prezidente Autoridade Munisipál Lautém enkoraja, hahú ohin ba oin nafatin kontinua treinu ba iha sa-sana ne’ebé iha Lospala Boxing Clup (LBC) ne’ebé eziste iha Munisípiu Lautém, tanba ida ne’e ba oin karik iha jogu internasionál no iha Nasional, presiza komunika iha Autoridade Munisipál Lautém hodi bele hala’o koordenasaun ba malu, oinsá lala’ok viajen ba tuir kompetisaun nian, hodi bele apoiu tuir kbiit ne’ebé Munisípiu Lautém iha.
Mélio de Jesus hateten, labele kontente liu ida agora hetan, maibé iha hanoin nafatin atu avansa ba klase sira tuir mai.
“Nu’udar Lautém oan konvida Povu Munisípiu Lautém atu fó apoiu Boxista Fabiano inklui Delio no Daniel, ne’e lori ona Timor-Leste nia naran iha mndu Internasional”.
Prezidente Autoridade Munisipál Lautém fó mensajen ba jerasaun foun sira iha Munisípiu Lautém, labele nakar iha li’ur hodi provoka malu, atu kria problema, maibé di’ak liu tuir treinu iha área boxista nian, nune’e bele nakar iha rin laran, tanba agora laiha ona tempu atu baku iha li’ur, maibé iha tempu tuir kompetisaun iha nasionál no Internasionál.
loading="lazy" />