Aviaun bele “semo no tun” iha aeroportu Dili maske inundasaun orseik

Imajen: Aviaun ne'e iha Aeroportu Internasional Nicolau Lobato, Comoro Dili, tersa-feira (09012024).
banner 120x600
167 Views

 G-NEWS (DILI) – Aeroportu Internasional Nicolau Lobato Comoro, Dili, nakfila sai lagoa ki’ik hafoin udan boot ne’ebé akontese iha tersa-feira semana ne’e, hodi hamosu inundasaun.

Tuir observasaun G-News iha terrenu nota, Aeroportu Internasional ne’e nakonu ho bee hahú hosi estrada parajen kareta nian.

banner 325x300

Tuir fontes ida ne’ebé servisu iha Aeroportu, ne’ebé G-News lakohi fó sai nia identidade, konfirma, situasaun ida ne’e bele afeta servisu atendimentu públiku bainhira la iha intervensaun.

“Situasaun ida ne’e halo ami sira servisu iha ne’e mós la seguru kuandu udan boot, tanba kondisaun grave tebes, no hafoer Timor Leste nia naran, tanba ne’e hanesan odamatan Timor nian ne’ebé vizitante internasional sira tama no sai”, tenik fontes konfirmadu hosi G-News.

Bainhira G-News husu kona-ba posibilidade bele uza Aeroportu Internasional Komandante Em Xefe Kay Rala Xanana Gusmão iha Suai, no Rota do Sândalo RAEOA, maibé nia informa, ida ne’e desizaun hosi Governu nian.

Tuir nia, atu uza Aeroportu rua seluk iha Suai no Oecusse, governu mós tenke prepara kondisaun hanesan transporte ba passajeiru sira atu transporta mai kapitál Dili.

“Ita bele uza aeroportu Suai no Oecusse, ne’e depende ba desizaun hosi Governu nian, maibé atu uza mós, ita nia Governu tenke prepara kondisaun sira hanesan, transporte atu lori passajeiru sira mai Dili, fatin deskansa nian, se buat hirak ne’e la iha hotu, entaun ne’e susar tebes”, informa hosi fontes ne’e.

“Aeroportu ne’e ita haree hanesan tiha Danau ki’ik. Kuandu udan boot ne’e, sempre hanesan ne’e. Udan hanesan bain-bain mós udan been tama laran iha fatin ema hein ne’e”, fontes ne’e esplika ba G-News.

Funsionáriu seluk ne’ebé G-News la públika mós ninia identidade esplika, aviaun sei bele kontinua tun iha aeroportu tanba udan para ona.

“Orsida aviaun bele tun tanba agora ne’e la udan. Orseik ne’e aviaun sai hotu ona mak foin udan. Servisu la’o ho di’ak, pas orseik lorokraik atu fila ne’e mak udan. Bain-bain udan ne’e sempre hanesan ne’e”, tenik fontes ne’e.

Maske nune’e, situasaun ida ne’e la afeta ba servisu atendimentu públiku.

“La afeita ida, orseik servisu hotu ona mak foin udan boot ne’e. Bee nalihun iha oin de’it, la tama ba office laran”.

To’o informasaun ne’e fó sai, G-News seidauk halo konfirmasaun hosi autoridade relevante.

Jornalista            : Ekipa G-News

Editór Testu         : Amito Qonusere Araújo

relavante