G-NEWS (DUBAI/INTERNATIONAL) – Aviaun funu indianu ida monu durante exibisaun ida iha Dubai Airshow iha loron-sesta (21 novembru 2025), hodi hamate nia pilotu iha espetadór atus resin nia oin. Aviaun funu Tejas nian halo hela manobra bainhira xoke derepente ho rai, hodi hamosu bola ahi boot ida. Pilotu la konsege hasai.
Insidente ne’e akontese iha tribuna sira nia oin ne’ebé nakonu iha loron ikus hosi espetákulu aéreu boot liu iha Médiu Oriente.
Eskritóriu mídia governu Dubai nian konfirma ona “mate trájiku hosi pilotu”. Forsa Aérea indianu (IAF) hatete katak sei halo investigasaun ida kona-ba asidente ne’e.
“IAF lamenta tebes ho lakon vida no hamriik metin ho família ne’ebé lakon iha tempu tristeza ida-ne’e,” deklarasaun ofisiál IAF nian hatete. Fatin asidente nian maizumenus kilómetru 1.6 hosi fatin espetákulu nian, área ida ne’ebé nakonu ho aviaun, helikópteru sira, no ekipamentu militár no sivíl sira ne’ebé hatudu estátiku.
Prezidente no Primeiru-Ministru Emiradu Árabe Unidu nian, figura sira indústria aviasaun nian, no ofisiál militár sira ho pozisaun aas maka entre vizitante rihun sira ne’ebé maka tuir semana expo nian. Vídeo sira ne’ebé sirkula iha mídia sosiál hatudu aviaun monu no nakfera iha ahi bainhira hetan impaktu. Suar ne’ebé maka’as mosu hosi fatin asidente nian bainhira veíkulu emerjénsia sira halai ba área ne’ebá.
“Pilotu ne’e semo iha altitude ne’ebé ki’ik, halo manobra sira ne’ebé risku”, hatete hosi sasin irakianu Hassan Loqman ba AFP.
“Nia parese tenta atu evita asidente. Nia hahú dirije aviaun ba leten, maibé nia la konsege halo ida-ne’e iha tempu,” nia hatutan.
Insidente ne’e akontese minutu balun antes inísiu ne’ebé maka marka ona ba espetákulu voo nian loroloron nian. Rolu barríl, loop, no manobra aeróbiku sira seluk hahú fali hafoin pauza badak ida. Ida-ne’e maka asidente daruak ne’ebé envolve Tejas ho tuur-fatin ida de’it iha tinan rua nia laran. Tejas ida monu durante ezersísiu treinu ida iha Rajasthan iha fulan-Marsu tinan kotuk lahó kauza vítima ruma. Iha fulan-Setembru, Índia asina kontratu ida ho osan tokon $7 ba aviaun kombate Tejas Mk1A hamutuk 97 hodi troka nia frota MiG-21 sira ne’ebé halo iha Rúsia. Tejas tama iha servisu ho Forsa Aérea Indiana iha 2016 no dezenvolve tomak iha rai-laran.
Asidente iha loron-sesta ne’e fiar katak sai hanesan fatalidade dahuluk iha istória Dubai Airshow nian dezde nia inísiu iha tinan 1986. Emirates no flydubai mós fó sai negósiu boot oioin durante espetákulu, inklui Emirates nia pedidu ba aviaun Boeing hamutuk 65 ho folin dolar biliaun 38.
loading="lazy" />